MANUTD vs FC Midtjylland (Players rating)

The way the Europa league arrange all the bad Belle people don already prepare how dem go laugh and yab us after we lose the first leg 2-1 for Denmark. The way God take fall their hand dem no believe as we even knack dem better akpako come even qualify with swag join.

Before the match start,  we all worry as we hear say Martial and Smalling no go follow play the match. Last-last, LVG go Academy go select some better pikin wey go knack the kind ‘horny’ football wey he talk say he want.

The match sweet no be small, even as na dem Midtjylland first score na so our boys come vex knack dem better 5 goals tell dem to go house go drink water put.

Na the players report card go follow now, make una enjoy am:

Romero: the goal wey he chop no be him fault. But my main problem na why he no dey quick play back pass wey dem give am. He seriously need to work on that. I go give am 6.

Varela: he help put pressure as he use him wing well and do some better crosses for the match. I give am 6.5

Carrick: he play as defender for the game.  He show say he no too sabi because the way wey he take dive for the tackle wey dem take score the first goal no good at all. I go give am 6.

Blind: he self follow chop inside the blame for the first goal as he just throw leg instead of to tackle player.  Apart from that he try for the game with him crosses and passes.  I go give am 6

Riley: he knack better ball as he no even show say he be small pikin or say na him first match for the main team be this.  He really compose for the match and I dey impressed with how he grab the opportunity. I go give am 6.

Herrera : he win us penalty, he score penalty and he create some good chances. The one wey pain me pass na the header wey he miss. I go give am 6.5

Schneiderlin : he try well as he hold the midfield well.  He even try one sangalo kick to score and he do one header wey chop bar. I go give am 7

Lingard : he use him gala-gala run disturb dem well so tey he even help give person yellow card. I go give am 6.5

Mata: na him no impress me at all for this game.  As a senior player, I feel say na him suppose dey run things for the match. Him penalty be like back pass. I go forgive am cos of how he take stretch call the ball back for our second goal. I give am 6

Depay : everybody know say I no dey hide mouth for Memphis matter and the nonsense he dey play but the boy surprise me yesterday. I wan believe say na because LVG talk say make dem play ball like person wey ‘agro’ catch. Na him best performance for me this season be this. I hope he go fit continue this form.  I give am 9.5.

Rashford : our elders talk say if person own no spoil another person own fit never better.  Martial last minute injury na why this pikin play and he grab the opportunity as pikin dey grab mama breast. He deliver two goals on him first match. I give am 9


Rojo: he don show signs say he ready to knack ball from him injury. He no give any wàhálà for the game.  I give am 6

Pereira: he get good game. Even though na like  5minutes he play. He no spoil ball when he enter.  I go give am 5

Poole: time no dey to fully assess am. I go give am 4

Na the players report card be that.  I hope say we go fit carry this our ginger enter  weekend game. Anything wey LVG tell the boys yesterday na wetin make he tell dem on Sunday. Until that game, make we remember  say #UNITEDWESTAND


Wetin you think?

Fill in your details below or click an icon to log in: Logo

You are commenting using your account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s