How una go fit follow the match: Manchester United get important away match against West Ham on Tuesday night. The match go start at 19:45 BST. We go give una live commentaries for our official Twitter account @ManUtdInPidgin.
How everything take be: Louis van Gaal’s men sabi say if dem fit knack West Ham, dem go fly enter fourth place (dem go dey gap Man City with 1 point) with only one more match to go (against Bournemouth) before the season go finish. The last match wey West Ham play, Swansea knack dem 4-1.. As dem lose that match, their hope for Champions League don end realistically. Slaven Bilic’s side go wan revenge onto say na we kick dem commot for FA Cup last month.
Form guide: United dey form onto say dem don win five out of the last six matches wey dem don play. Out of the last 11 matches wey United don play, na only once wey dem don lose. Fashi say United no too play well against Norwich, dem sha knack dem 1-0. The last three matches wey United don play away from home in all competitions, dem don win. Before The Red Devils bin knack West Ham for FA Cup for their house, West Ham bin dey unbeaten for there since August but as Swansea wakka enter there, knack dem 4-1, e shock everybody.
The last time wey the two teams jam: Many people bin talk say West Ham go knack United for FA Cup after dem play 1-1 for Old Trafford but as United kick dem commot (2-1), e boost their moral. The people wey score for United that day na Marcus Rashford and Maroune Fellaini before James Tomkins con score consolation goal for dem. If no be for De Gea, United for no win that match. E bin make some outstanding saves.
Team news as e dey hot: Daley Blind and Marcus Rashford bin rest for Carrow Road while Anthony Martial bin no play the match onto say e get injury. Matteo Darmian fit no play after e injure hin ankle for Carrow Road and Maroune Fellaini still dey suspended. Luke Shaw and Baba Schwein never come back from wound. Adnan Januzaj fit start for bench.
View from the dressing room: “No be small thing o, i don play for them before so i get many memories – some dey good, some na yama yama. Na big night for them. Time don reach make dem move on. Make i talk truth, i bin prefer the older Upton Park, when it bin dey tighter, E bin dey hostile and it dey intimidate person. I still remember am sha, like say na yesterday.” – Michael Carrick,a former Hammers midfielder don yarn.
Danger man: Dimitri Payet na one of the best players this season, and him na the main creative player for West Ham. The French man sabi score free-kicks die, even when United play them for FA Cup, e score free-kick for Old Trafford but Anthony Martial save us before the match finish.
Referee: The person wey go ref match na Mike Dean. The matches wey e don ref this season for United na their 3-3 draw against Newcastle, na him also ref the matches wey West Brom and Tottenham knack us.