Marcus Rashford bin jolly for hin first England match yesterday, E tear net for two minutes and 18 seconds after match, while Wayne Rooney score one mad goal as England knack Australia 2-1 in Sunderland.
Rashford bin turn star boy for hin first match o. E pass to Sterling, E con run enter free space. Sterling con cross for am, and e no even allow the ball drop, e volley am inside net. na hin stadium scatter.
E mean say him na the youngest pikin wey don ever score for England now, e don beat the record wey Tommy Lawton set for 1938. Also him na the third youngest marksman for the Three Lions behind Rooney and Michael Owen.
E remain small Rashford for score again, but e no fit use the ball wey Sterling give am. E remain small e for get assist self, e give one fine ball to Lallana but the guy no fit score am. Rashford impress for the match sote dem give am Man Of The Match. Hin get plenty neat touches and e dey carry ball run.
Rooney bin wakka commot from bench as half-time start… E bin score mad goal for England on 55 minutes….Na Rashford wey start the move, e do one fine dummy, person confuse, Sterling con carry ball run, e con find Rooney, wey dress ball and e smash am for Top corner.
Chris Smalling na capo for the match, e wound himself small and e commot for the 73rd minute… The person wey replace am na Eric Dier, wey score own goal as the match con finish 2-1.