Manchester United midfielder Juan Mata go wan make early statement as Jose Mourinho and Pep Guardiola’s teams go soon battle each other for China.Juan Mata go wan show everybody say him na still important player when the two Manchester teams battle.
Everybody wey dey this world go wan watch the Manchester Derby wey go happen for China onto say dem go like see Jose Mourinho (Manchester United) vs Pep Guardiola (Manchester City).
The two clubs go face eachother for International Champions Cup wey go happen for China, dem two go also face Borussia Dortmund.
Juan Mata don sharply do one interview ontop the matter.
“Right now ehn, the koko no be the result, the koko na make person full ground again, and make hin brain dey reason well, but e no go easy to knack ball against City and Dortmund, even if na just friendly match,” Na wetin Juan Mata yarn. “The match go dey special as United and City fans yakpa for China. The derby match go tough but the fans go enjoy am. I dey reason say we go learn many things and we go try win like the way we do last season for United States. E go make sense to win this Tournament as na big big clubs dey inside am. ”“E sure me say everybody wey dey China dey jolly onto say we dey come. I never go China before sha, na my first time and e dey hungry me to see how Manchester United dey love for that side. I sabi say we get many fans there.”
“We don wakka enter States two times since wey i don wakka enter United and e make brain. We bin knack ball against Barcelona and Real Madrid and other teams wey full ground and our fans yakpa pass their own.”
“I no fit believe say fans fit love us that way for America, e dey hungry me to see all the people wey dey support us for Asia.”