Manchester United midfielder Juan Mata don respond to all the transfer speculation wey una dey see for ontop Social Media.
Una sabi say Juan Mata and Jose Mourinho bin get small problem when e dey for Chelsea, e bench am sote the guy frustrate. Later, Juan Mata con run enter Manchester United when David Moyes still dey here.
Mata bin enjoy three years for Red Devils but na only one trophy wey e don carry, Emirates FA Cup. Now Jose Mourinho don follow am enter Manchester United, nah in everybody con dey talk say Mata go commot. Even ‘Mail News’ bin talk say Everton wan sign Juan Mata, say them sight Mata for London side, and e dey follow Everton talk but all na lie.
Juan Mata don sharply yarn ontop the matter as e tire am say people dey use hin name sell paper.
“My people, no be everything wey una see for Social Media, una suppose believe.” Na wetin Juan Mata yarn as e bin dey drive commot for Carrington with Ander Herrera.
Juan Ikeji bin play second half for the match wey United play against Wigan. Him get assist for the first goal wey Will Keane score and e bin dey involved for the second goal wey Andreas Pereira score (na him pass give Herrera ball, as Herrera shoot and defender block am, Andreas Pereira use vess tear net)