Everything to Ginger Una For Manchester United vs Borussia Dortmund Match

Manchester United vs Borussia Dortmund

Manchester United don land for Chinko town way we dey call China as dem dey fast forward for their pre-season matches. Oga Boss Mourinho and him team don dey carry fire for their second match wey be against Borussia Dortmund. Dis match na the first of the Tour 2016 wey Aon go dey present and e go dey happen for Shanghai Stadium for Friday. The time of the match na 13:00 BST and una fit watch am on top MUTV or make una follow @manutd and @manutdinpidgin for live update as e dey hot.

Manchester United bin win their first pre-season match against Wigan Athletics 0-2. But dis match no go resemble that one as Dortmund no be shere shere team and na dem carry second for Bundesliga last season. This match na the first big match wey Oga Boss Mourinho go coach Manchester United and fans no go wan miss am at all at all. The team don dey ginger wella for dis match as dem dey knack play play ball for Century Park so their body go gel wella with Chinko weather. The match go be the start of three-team Chinko version of the 2016 International Champions Cup wey Manchester City gather join inside the tournament and dem dey one corner dey wait to knack ball against United after dis one.

The Main Koko for Manchester United vs Borrussia Dortmund Match

Henrikh Mkhitaryan (Miki-Miki) go wan start for dis match as na him former club Manchester United dey carry fire go meet for Friday. Him be knack ball for Borrussia Dortmund from 2013 before United come buy am this season. For the last match against Wigan Athletic he knack better ball as he send Wigan players go market make dem go buy aboniki robb to rub their body after the match end. For that match him be start for the number 10 position and the way he take play he bin show say he suppose start for dis match so him go fit show plenty fine fine waka pass leg over from the right side of field.

Mourinho Press Conference: Pogba dey come? E no dey come? I no go tell you

Another player wey don knack ball for Dortmund before and wey go wan show him abi-ni-bi (ability) as baller for Manchester United na Adnan Januzaj wey dey loan for Dortmund last season. He never really too show him shabbiness for Manchester United and even for loan last season him no too knack ball so him go dey reason this match as way to downloadhimself for Oga Boss before season start wella.

Juan Ikeji wey bin no start the match against Wigan Athletic for Saturday but later enter for second half go dey ginger to dey the starting of this match as many amebo people don dey talk say him fit no dey Oga Boss Mourinho plan but him be show for that Wigan match say him get ball sense as he knack better ball for the match and he even throw assist for Will Keane wey the small boy score.

Marcos Rojo wey just commot for holiday enter tour with Manchester United go wan knack ball for Oga Mourinho because of all the amebo tori way dey on top him head. Timothy Fosu-Mensah na one player wey suppose get chance to join Ander Herrera knack ball for midfield as Morgan Schneiderlin, Marouane Fellani and Baba Schwein still dey joli for their holiday dis na better way for am to show him abi-ni-bi for midfield. We don sabi as him dey ball for defense but na midfield him dey control anytime he knack ball for Dutch pinkins (Under 20s) and Manchester United pinkins (under 21s) so he go make sense if Oga Boss fit give am chance for dat area.

Henrikh Mkhitaryan: I go epp Manchester United to carry titles

Dortmund don sell many of their big ogbonge players like Matts Hummels, Ikay Gundogan and Henrikh (Miki-Miki) Mkhitaryan and dem dey try start from beginning again to build better team for new season way dey come. Dem too don buy new new tear rubber players like Ousamane Dembele, Marc Bartra and Raphael Guerreriro to enter for their squad, but na pikin all of .dem be. Shinji Kagawa fit show for the match and una never forget say him play for Manchester United before he commot go Dortmund back for 2014. Everybody sabi Pierre-Emerick Aubameyang wey be their striker say he no dey joke for front of goal as he bin score 39 goals for 46 games last season and na only Robert Lewandowski of Bayern Munich pass am for that one.

Dortmund don face Oga Boss Mourinho before for 2013 when him be Oga Boss for Real Madrid and Jurge Klopp be Oga for Dortmund that time. Dem win the match 4-3 for aggregate as dem waka enter final of Uefa Champions League way dem lost to Bayern. Their new Oga Thomas Tuchel don real try for dem as he carry dem enter second last season for Bundesliga. Dem don knack ball for four pre-season matches and dem win three but lost the last one 1-0 to 1860 Munich.

Luke Shaw: We wan impress Jose Mourinho and fans for China Tour

Before Before Matches

The two teams never too knack ball against each other as na only six times dem don check each other out. And all the times wey dem don jam na for overseas (European) matches way be home and away matter. The freshest of the checking out na for 1997 Champions League semi-final, wey Dortmund be win 1-0 over two legs as dem waka to carry the cup. But United don win three of the checking out way happen before and na for 1964 dis one take happen as United be beat dem 4-0 for Old Trafford for Inter-Cities Fairs Cup.

Advertisements

One thought on “Everything to Ginger Una For Manchester United vs Borussia Dortmund Match

  1. Pingback: Mario Götze don wakka enter back Borussia Dortmund – E give Liverpool better ela | MAN UNITED IN PIDGIN

Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s