Everytin You Gaz Know About Man Utd Transfers: Who don enter? Pogba? Fabinho?

Dis na everytin wey you gaz know about Manchester United transfers since last week take waka enter today (Friday). Plenty don shele since Baba Ibro and Mita Mita don join body wit de club. Make una check am out. No dull am!



Juve want £100m for Pogba. (c) SkySports

Make we start wit de one wey dey hot for everybody chest like pesin wey chop hot beans witout cold water com go get heart burn join, Na Paul Pogba mata o. Plenty Manyu fans don dey tire sef for all de amebo wey just plenty like sand-sand and Manyu never still confam say dis guyman don sign contract finally.

Some even dey yarn say we no need am, say make Baba Special find player wey beta pass am for market. But either you want Pogba abi you no want am dis na wetin dey shele presently.

Massimiliano Allegri: Jose Mourinho i dey warn you, commot eye for Pogba matter

Even Pogba agent, Mino Raiola write for twitter yestaday say de deal never done o!

As per amebo wey ManUtdInPidgin don do dis week ontop de mata, Manyu still dey toast Juventus for de befor befor player and dem no wan gree until we break de most expensive player record.

De first offer na for meeting between executive vice-chairman Ed Woodward, Pogba agent Mino Raiola and Juventus general manager plus including CEO Giuseppe Marotta. Juve bin talk say make Manyu go use dem £85m go do toilet roll on Tuesday, and as per fresh amebo wey dey com from Italo, we hear say Juve wan collect £100m and oda small-small money go dey too.

Paul Pogba Transfer Amebo: Man United wan pay Juventus €100m

Manyu don give everybody number now and dem no give anybody number 6 wey Pogba dey wear for Juve. I go let una mind do de rest.

Pogba still dey for holiday and hin no go enter Turin back until August 6.

But wetin dey confam na say Juve don yarn say Pogba go comot for de club, so de ball dey our court now.


If Pogba transfer no work, Baba Special fit go buy Blaise Matuidi from PSG.


Ontop list of players wey fit join body wit Manyu anytime Fabinho dey top am becos Baba Special don open mind say hin need de right-back and money wey dem wan give Monaco na about £22m.

In case una never sabi, Mourinho get de same agent as Fabinho, Jorge Mendes and hin don play under Baba Special befor when Real Madrid loan am for May 2013.

As per recent amebo wey we don get for internet e don confam say Fabinho go join us but na time we never know.


One tori wey start to dey hot for internet yestaday na James Rodriguez own.

As per say de midfielder dey sweat to enter first team for Real Madrid e go easy small to kolobi am from de Spain club and Manyu don tear ear for hin agent make hin dey ready biro and paper.

Man United don yarn the agent wey dey manage James Rodriguez to expect £54m for table

But wetin me dey tink na say if Pogba deal no plum then na Rodriguez fit next.

Oda pipu wey dey for Manyu radar na Leonardo Bonucci (after Pogba deal finish), Renato Sanches (dis one na plan ahead for Baba Special), Usain Bolt (make una never laff. Read de link wey dey below).

Usain Bolt: E sure me say Mourinho go sign me for Manchester United


Juan Mata don get small confido say hin no go comot as Baba Special don yarn de guyman say make hin try fight for hin shirt o.

Plenty amebo pipu don dey yarn say Mata dey go Everton. Some even talk say hin don gree to go sef. But Mata don yarn all man say make dem calm down say all na ordnary rumour.

Jose Mourinho don yarn Juan Mata say e get future for United but e gots fight for shirt

Marcos Rojo still fit go as Villareal still dey chook eye for hin mata. De same tin as James Wilson sef, Fulham dey ontop hin mata.


One thought on “Everytin You Gaz Know About Man Utd Transfers: Who don enter? Pogba? Fabinho?

  1. Pingback: Manchester United and City dey prepare to fight for Brazilian starboy Gabriel Jesus | MAN UNITED IN PIDGIN

Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s