Manchester United goalkeeper David de Gea don yarn ontop some important issues wey dey happen for Old Trafford.
As una sabi say Red Devils don get new manager ‘Jose Mourinho’ and dem don sign some new players like Zlatan Ibrahimovic, Eric Bailly and Henrikh Mkhitaryan, the matter dey sweet De Gea wella.
Last season, De Gea bin wan commot onto say e Real Madrid bin dey purshue am but Louis van Gaal use padlock tie hin leg. After transfer window bin close, De Gea and Van Gaal con settle their beef bur the rumour wey we bin dey hear na say De Gea for wakka commot this summer if say Man United no sack Baba Philo Philo.
The first person wey De Gea yarn about na Zlatan, then e con yarn about our signings in general.
“Papa Ibro na Top player o, e sabi strike gan. E sabi kill for anything wey consign post and we dey pray make e show hin best for Manchester,” David de yarn. “i dey reason say the players wey we sign make brain. Na we be Manchester United and we wan win everything.”
David de Gea con yarn ontop Baba Special.
“Mourinho get strong character. Him na winner. Him na one of the best managers wey dey this world and everybody dey feel hin presence.”
David con yarn ontop the AON Tour wey dey happen for China.
“To train for here no easy but we dey enjoy am. The way our fans for China dey love ehn, if person for tell me say na how dem dey do, i for no believe. This tour crazy gan but e dey help us..”
David de Gea bin sit for reserve bench as e watch hin teammates set yansh anyhow as dem collect 4-1 from Dortmund.