Reports wey dey commot from Brazil talk say Jose Mourinho dey chook eye for one 19-year-old pikin , but say Manchester City don already table €32million for the guy.Manchester United and Manchester City dey ready to finish eachother for transfer market ontop Brazilian winsh Gabriel Jesus.
The small pikin wey sabi strike, don shine wella for Palmeiras this year, and as e blow, many top European clubs dey chook eye for hin matter.
City dey lead the race for the matter as dem table around €32million for the guy this week, we even hear say Pep Guardiola don call am for phone, and e tell am say e wan sign am sharp sharp.
But Jose Mourinho and United self dey chook eye for the matter.
Wetin wey Globo reporters yarn na say, the Red Devils don yarn Palmeiras say dem dey ready to table €35million for the pikin.Palmeiras coach Cuca don already yarn say e dey pain am say Guardiola dey follow hin player talk, behind hin back… Cuca dey pray make Gabriel remain till 2016 finish.