How una go fit follow the match: The Manchester Derby go happen for Beijing, China. The match go start at 12:30 BST. We go give una live commentary ontop the Derby match for our twitter account @ManUtdInPidgin.
How everything take be: This na the first time wey Manchester United and Manchester City go do battle under their new managers Jose Mourinho and Pep Guardiola. Two men wey battle each other gan for Spain. Fashi say na only pre-season match, many fans dey ginger to watch the match.
Wetin You gots know: Though United na the away team for the match, dem go wear their new adidas 2016/17 home jersey, onto say dem just launch am on Saturday.
Team news: Mourinho dey prepare to change hin starting line up, as e still dey do trial and error and no be every United player don resume work yet. Make una no expect say e go use the same starting line up, wey e use against Dortmund. The people wey play 90 minutes against Dortmund na Ander Herrera, Eric Bailly, Luke Shaw and Juan Mata so expect dem to start for bench, make fatigue no finish dem. E shock me say Marcus Rashford wakka commot from bench against Dortmund, after Mourinho don already yarn say e no go use am for any match. E fit start tomorrow sha.
The last match wey Man City play: The last match wey Manchester City play na against Guardiola former team Bayern Munich. Bayern knack City 1-0 last Wednesday. The people wey start the match for City na Caballero, Adarabioyo, Angelino, Fernandinho, Barker, Navas, Maffeo, Kolarov, Fernando, Zinchenko, Iheanacho.
This na wetin Man City player yarn: “The boys dey ginger and we dey ready to impress the new manager – The kind football wey we dey play, dey sweet us.”- Fabian Delph
This na wetin Man United player yarn: “City na our rival o and e dey important for us to tear their yansh. Since when i don wakka United, the times wey we don knack dem, pass the times wey dem don knack us. The match dey important for our fans.” – Ander Herrera
Manchester City manager: Guardiola na one of the best managers wey dey this world. E bin coach Barcelona for four years and e carry 14 trophies. E don carry Champions League twice, for 2009 and 2011, wey e knack Sir Alex Ferguson and hin United team in both finals. When e bin dey Bayern, e no fit carry Champions League sha but e carry League.
Who ne their Star player? The person wey our defenders gots look out for na Sergio Aguero. This guy na winsh. Our defenders also gots look out for Kevin De Bruyne. Dem two don join score 45 goals last season, but i doubt if dem go play tomorrow. The person wey fit strike for them na Nigerian starboy Kelechi Iheanacho. For hin first season for City for 2015/16, e tear net 14 times. E don see chance to impress Guardiola.
Last time wey the two teams meet: The last time wey Man City and United do battle. Na Marcus Rashford send them enter gutter as Red Devils knack City 1-0 for Ethiad Stadium.