Real Madrid centre-back Raphael Varane don yarn say hin no dey go Manchester United to join hin former manager Jose Mourinho. Last season, e bin hard Varane to see starting shirt, as Zinedine Zidane bin prefer Sergio Ramos and Pepe over am.
Zidane don already yarn say the 23-year-old sabi play ball, and e talk say Varane fit dey bench Pepe very soon, e fit no be this season sha. With the way Pepe take play ball as Portugal carry cup at Euro 2016, e go hard Varane to bench am. Pepe na one of the best defenders for the tournament.
If say Varane dey wakka enter Old Trafford, e for see starting shirt under hin former boss Jose Mourinho but e refuse and e talk say e wan warm bench for Real Madrid, and e dey hope say the 33-year-old Pepe go tire so e go fit replace am.
The thing wey funny about the whole matter na say for 2011, na Zidance wey whine Varane to wakka enter Real Madrid to knack ball for Mourinho’s team but now e dey prevent am from joining Mourinho again.
Baba Special gots settle for wetin hin already get, Chris Smalling, Eric Bailly and Daley Blind…. E go sha dey pray make none of them wound because anything wey go make Phil Jones, Marcos Rojo enter defence, na wahala.