The woman ‘Samantha’ wey be Manchester United striker Anthony Martial wife before e go yansh another woman, don use style yab am on Instagram. Everything bin happen after the 20-year-old Red Devils foward lose hin number 9 shirt to Zlatan Ibrahimovic last week.
Reports wey we bin dey hear from France, na say Anthony Martial dey vess say United give Zlatan hin No.9 shirt after hin don already brand the number, and dey con give am (Martial) Ryan Giggs number 11 shirt.
As everything bin dey unfold, the thing sweet Samatha sote she go like the No.9 pishure wey Zlatan Ibrahimovic put for hin instagram.
No be today wey Samantha don dey yab Martial. The last time wey she yab am na during the Euro 2016, when she talk say hin dey play like mumu, she even yab hin new babe ‘Melanie Da Cruz’ say make she dey ginger Anthony Martial to play better ball, say no be everytime, she go dey ask am to show am hin stick.