Daley Blind fit vess for Wayne Rooney after e hear wetin the Manchester United captain yarn about am for one interview wey e run on Facebook Q&A session.
The person wey be reporter for Rooney’s Q&A na Ashley Young, and e dey ask Rooney questions, Rooney dey answer.
Ashley Young bin ask Wayne ontop who the slowest person for United be, the England Captain con talk say na Daley Blind. As Rooney talk am, dem two burst laugh.
This na wetin Rooney yarn: “The person wey slow pass? Na Daley Blind now. Abeg no vess Daley… But hin brain dey think wella, fashi say the guy no sabi run, e sabi use hin mind wella but if dem say make me and am do race, e go carry last.”
Ashley Young con ask Rooney ontop who the fastest player for United be.. At first, Wayne talk say na himself den e con talk say na Ashley Young. Then e con take the question serious and e talk say na among Antonio Valencia, Anthony Martial and Luke Shaw.