Sunderland new manager David Moyes go like make Manchester United winger Adnan Januzaj wakka enter hin club, na wetin Daily Mail report.
The Red Devils attacker Januzaj bin blow for United when David Moyes take over from Sir Alex Ferguson but as Moyes no fit perform, qualify for Champions League, United kick am inside dustbin.
As Louis van Gaal con enter to replace am as manager, Januzaj no fit perform again. Last season wey Baba Philo Philo even get mind for am after e score winning goal against Aston Villa for Villa Park, the guy run go Borussia Dortmund for loan. E con flop for Germany sote Dortmund cut hin loan short. As e wakka enter back Old Trafford, e hard am to break into the senior team. Na so so bench or Reserves.
Now wey Jose Mourinho don become Manchester United manager, e go hard Januzaj to enter the starting lineup as plenty players wey better pass am dey. So David Moyes dey reason say e fit snatch am to chook am for first team for Sunderland.