Manchester United midfielder Ander Herrera don become Papa, hin babe Isabel Collado don deliver bouncing baby girl. The name of hin baby girl na Daniela.
Reports wey we hear na say, hin girlfriend ‘Isabel Collado’ deliver the baby on July 25th 2016 but Ander bin no wan loud the matter for social media, as e dey like keep hin private life off social media.
Hin babe instagram handle na @isabelcollado but she use padlock lock am self as she no wan make people disturb am.
When the Manchester United midfielder first wakka Old Trafford, na Isabel teach am how to speak English. She bin dey give am homework self. Hin English never reach 100% yet sha but e don improve pass when e first come England.
Ander Herrera bin struggle to find starting shirt for Louis van Gaal’s team onto say sometimes, Baba Philosophy go use am, other times, Baba Philo go just keep am for bench, dey start Fellaini.
Now, Ander fit revive hin career for Manchester United under new manager Jose Mourinho as e be like say Baba Special wan revolve hin midfield around am. If you fit observe all the pre-season matches wey don happen so far under Mourinho, Ander bin play the longest against Wigan Athletic and e play 90 minutes against Borussia Dortmund.