Zlatan Ibrahimovic na the player everybody go dey expect to carry Manchester United to top of English football when 2016/17 season start. Now the fastest man wey dey this world don add to the pressure wey Zlatan go dey face.
The fact say The Former PSG striker Ibrahimovic wakka commot from France, to enter Old Trafford this summer na major statement from Jose Mourinho and now Olympics Egbon and Manchester United fan Usain Bolt, person wey sabi run pass bullet don commot yarn say e go dey watch Zlatan with side eye.
This na wetin Usain Bolt yarn for the video wey hin drop.
“Zlatan wetin dey? Na ur boy Usain Bolt. I just say make i welcome you o. Out of all the clubs wey you don knack ball for before, Na Manchester United be the best,” na wetin Bolt yarn.
“E dey hungry me to watch as you go dey tear teams yansh anyhow. I go dey watch you with side-eye, no fall my hand.”
If say na anyhow player now, dem fit dey worry with all the pressure wey dey their shoulder but Zlatan Ibrahimovic na senior man wey sabi deal with pressure. E sure me say pressure no dey hin body. Person wey tell Eric Cantona, say e go do pass am for United, so na Usain Bolt e wan dey fear? Abeggi.
If say Usain Bolt fit wish for anything en, na say him go like play ball alongside Zlatan for Manchester United but Jose Mourinho dey fear say e fit run, forget ball for behind.
The first match wey Zlatan fit play for United na against Galatasaray on Saturday July 30th.