Manchester United knack Galatasaray 5-2 for Gothenburg, Sweden on Saturday. No be small knacking wey i see with my koro koro eyes and as e dey hot, Jose Mourinho don yarn mind ontop the match.
“E dey very important say my players don tap football again for some minutes ontop the knacking wey Borussia Dortmund give us for China. Dey bin need am,” na wetin Jose yarn.
“We no too get time to work on new plans and try out new things. With time sha, everything go gel. We get match against Leicester City.”
“If to say i no get plans for any of these players ehn, then i no go play dem…dem no go even dey my squad self. So i get plan for them,” Jose still dey yarn.
“The way my players take ginger ehn, e sweet me. I even like am as we bin make mistake so we go fit work on am for training.”
“Na the same thing wey i go do again on Wednesday, i go play 22 players. The result wey we dey get no consign me. The koko na make all my players full ground.”
Then Jose Mourinho con yarn ontop the impact wey Zlatan Ibrahimovic show for the match.
“Papa Ibro don show us a tip of the iceberg o. E don show us say e go tear net yakpa this season.”
The next match wey Manchester United get na against Everton on Wednesday, before dem go wakka go face Leicester City for Community Shield.