Red Devils fans dey hail Eric Bailly, as dem hear say e bin turn down chance to sign for Manchester City, ontop say e wan wakka enter Old Trafford.
The 22-year-old na the first player wey Jose Mourinho sign for Red Devils from Villarreal in May. The money wey United drop to collect am na £30million.
The Ivory Coast defender bin wakka enter La Liga in 2014, but na last season e blow for Spainish League.
Manchester City bin dey chook eye for the guy matter, them even send Yaya Toure to whine am, so e go fit wakka enter Etihad.
However, Bailly don commot yarn say e tell Yaya say make e lock up, say e wan enter Old Trafford to tap football for Jose Mourinho.
“I bin wakka enter United because i dey yori yori for Mourinho matter, wetin i talk no hard,” na wetin Bailly yarn for Sunday Times.
“I bin wan tap football for person wey dey work hard. I bin no follow Pep Guardiola talk sha but their assistant manager bin call me for phone and then Mourinho con call me.”
“E tell me say make i come tap ball for am. I prefer Mourinho to am (Guardiola) na, ontop wetin e achieve with Didier Drogba.. The way Mourinho take work with am, i like am.”
“I don play ball with Didier for Ivory Coast before, him na my paddy and e don tell me all the many many things wey Jose do for am.”
“Yaya bin call me, say make i show for City… But once Jose call me and Didier word with me, i know say na him i wan play for.”