- Paul Pogba dey flex for Newyork, USA
- The French Midfielder jam Hip-Hop Artiste Drake for one Show and e give am Juventus jersey – Fire punsh Devil
- Jose Mourinho talk say Red Devils go sign one midfielder wey carry weight before August 14.
The French International, Paul Pogba, wey Manchester United wan sign dey misbehave. Person wey suppose report for Old Trafford to do hin medical, dey wakka up and down for Newyork like say hin no wan play football again.
Paul Pogba and Drake 🔥🔥🔥🔥🔥
— Man United In Pidgin (@ManUtdInPidgin) August 6, 2016
E no tey wey e release one video where e dey learn kick boxing (I no know who e wan beat self, this one e dey practice how to fight), now e dey snap pishure with Hip-Hop artiste Drake..
The thing wey pain me pass about the pishure wey e take with Drake, na say e give am Juventus jersey -Fire punish Devil… See person wey we wan sign, e dey look like say hin brain off. Tufia.
In other News, new Manchester United boss , for hin press conference, yarn say Red Devils go buy new midfielder.
“Ehen, We go sign player wey hin name carry weight,” na wetin Jose yarn.
“The fact say we never announce Paul Pogba officially, mean say him na still Juventus player.”
“We dey do everything possible to make sure say we go finish our matter for transfer market before 14th. Next week, we go finish.”