We dey hear strong reports say Manchester United winger Juan Mata wan hand in transfer request ontop the beef wey him and new Reds manager Jose Mourinho get.
No be today wey Mourinho and Mata beef start, e bin start for Chelsea. Na the beef wey make Mourinho sell am to Manchester United when e still dey Chelsea. Now wey Baba Special self don wakka enter Old Trafford, we think say dem two don make peace but as Mourinho put Juan Mata for second half against Leicester, and e con commot again out of every player wey dey field to put Henrikh Mkhitaryan, e show say Baba Special no get plans for the guy.
On that day, when the whole thing bin happen, 28-year-old bin dey para for the assistant manager then Mourinho con go explain say na because e short, say na why dey commot am. As e talk am, Mata laugh but deep inside hin mind, the Spaniard dey boil like fish wey dey inside hot soup.
Everton bin try purshue the Spaniard when Mourinho first enter for Old Trafford but they con fashi when Mourinho talk say him and Mata don make peace but as dem see wetin Baba Special do the Spanish midfielder in the community shield match, dey don reignite their interest as Ronald Koeman go like boost hin Everton squad with player wey get skill like Mata.
Make we sha dey observe everything wey dey happen sha because Manchester United don already yarn say dem no dey sell Mata.