Mancester United don dey reason for #POGBACK to shele since 2013- dat na like 12 months after hin be commot for Old Trafford. United don pay better big money-£89m to carry our pikin come back to the promise land after e go exile for four years for Juventus.
Oga agba-Sir Alex Ferguson no gree with Pogba agent Mino Raiola and for that reason hin no fit make Pogba sign new deal. We bin gather say the first time wey United bin first wan sign am after e commot na for 2013 after Fergie go rest.
Oga Ed Woodward wey bin collect job from Oga David Gill hand for 2013 sef arrange meeting with Raiola. And as e be say no be fight Paul Pogba take commot, our club don dey torch light monitoring spirit enter hin matter and dem see sey e dey do better for Juventus.
But some oga patapata for United talk say na just two months ago we reason am to carry the France pikin come house finally. Real Madrid bin won scatter the deal for dying minute but we give dem ela as we pay all the money wey Juve dey ask and we go even still dash dem £4.5m if Pogba extend hin deal.
In fact to show our big bros level we pay part of the money wey Raiola dey ask onto say na hin allow for the deal to shele and Juve go pay the remainder (we don try for dem).