As The Red Devils dey kick-start their Premier League campaign this Sunday against Bournemouth, Jose Mourinho don sharply do press conference and yarn ontop some pressing issues wey dey worry United fans.
The first thing wey e yarn about na say nobody don wound for hin squad but say Chris Smalling and Paul Pogba no go play against Bournemouth.
“No new player don wound, but Paul Pogba and Chris Smalling dey suspended, dem no go play o Sunday,” na wetin Mourinho yarn.
“But by Tuesday, Pogba go don full ground and e go fit play agaisnt Southampton.”
Jose Mourinho con yarn ontop Manchester United title ambitions, on whether e feel say e fit win League.
“Something dey do us inside our body, say we fit carry Premier League title. But we know say more than three other teams get this kind feeling too,” Mourinho still dey yarn.
“If when season finish ehn, another team carry League onto say dem better pass us, na so football take be.”
Una sabi say Adnan Januzaj wakka commot from Old Trafford, enter Sunderland to reuinite with former boss David Moyes on loan deal, Jose Mourinho don yarn ontop the matter.
“E (Januzaj) dey my plans, if say i no care about am or where hin dey go, i for send am to Borussia Dortmund, where e no go see chance to play even one match,” Jose Mourinho dey try talk say Louis van Gaal no get brain, say na him kill Januzaj career, say why e go send am to big team.
“We care about am (Januzaj). we know say him get talents. We no fit dey selfish, we dey think about our players and we know say e dey with manager (Moyes) wey care about am very well.”