Reds boss Jose Mourinho talk say Marouane Fellaini na key player for Manchester United, after the midfielder ball gan against AFC Bournemouth on Sunday..
Fellaini bin dey very important as Red Devils wakka commot with 3-1 win, as Juan Mata, Wayne Rooney and Zlatan Ibrahimovic tear net for Vitality Stadium.
After the match finish, the United boss bin wakka ontop MUTV and out of all the players wey e yarn about, e praise Baba Fella, and e talk say e believe say fans go ‘love’ the Belgian if e continue hin fine form.
“With Baba Fella, e dey do me for body say many United fans no like am,” na wetin Mourinho yarn. “But, if e continue dey tap ball like e dey play now ehn, they got love am o onto say e dey very important for us.”
Maroune Fellaini self wakka ontop MUTV and e talk say e sweet am say United bin start the season with three points, and e dey determined to show people say “United don come back.”
“The match bin no dey easy for both sides,” na wetin Fellaini yarn for MUTV. “Bournemouth bin play wella for first half. For second half, things con change and we con dey hold ball longer and we begin throw passes wey dey tear their defence yansh. Out of all the chances wey we see, we manage off their pant and na how we take knack dem. This victory dey good for us.”
“I dey hope say we fit score more goals this season but we gots continue dey work hard, so we go fit dey improve every match and for training self. The manager dey epp ginger us, say we suppose dey win matches, and e dey very important.”
“We gots dey improve every match if we wan do well this season and we wan prove to everybody say Man United don come back.”
Both Ibrahimovic and Eric Bailly bin dey the starting line-up alongside Baba Fella for the first Premier League match and dem two play well, as Bailly bin win Man Of The Match.
“The new people wey Baba Special buy sabi play ball o, dem dey bring better quality,” Fellaini still dey yarn. “Zlatan bin see one chance and e tear net, e dey good for us. Bailly bin full ground for defence and this Premier League wey una dey see so, we need that kind thing and we dey hope say e go fit continue like that.”
“Like everybody, i wan start now and i dey happy with wetin i show today, say i sabi play ball. I wan show the manager wetin i fit do.”