If person for tell me say Eric Bailly go steal shine from Zlatan Ibrahimovic, i for no believe, but na wetin happen for the first two competitive matches (against Leciester City and AFC Bournemouth) wey Manchester United don play this season. The way Baba B take full ground ehn, e be like say the guy na brick wall.
We wan sharply talk about the five things wey we feel say, make United fans yori yori for the Ivorian…
BAILLY NA BEAST
The fact say the Ivorian tall (hin dey six feet tall) and hin weigh muscular 12 stones, dey make am force to reckon with, sote opposition players don dey fear am already. The way e take chook Bournemouth player Josh King inside hin pocket on Sunday, e be like film trick. Even when Manchester United bin face Leicester City for Community Shield, the way e take mark Jamie Vardy, sote Vardy hail am, say the guy sabi. United fans don already dey compare the Ivorian to both Rio Ferdinand and Nemanja Vidic.
FEAR DEY CATCH AM? IF I HEAR
Before the Ivorian wakka enter Old Trafford on June 6, many fans bin no sabi am. The only thing na say when that day knack and Manchester United announce say dem dey buy defender from Villarreal for around £30million, people con dey google hin YouTube videos. As the 22-year-old wakka enter United, people think say fear go catch onto say the money wey dem pay for am too much, but if i hear. The way the guy take start hin career for United make brain. From the first United match wey e play against Wigan Athletic, Eric Bailly don already show say e get confidence gan. Jose Mourinho self dey impressed with wetin the former Villarreal defender: “When you buy person like am, question mark dey always follow,” na wetin the manager yarn.” onto say to tap ball for Spain dey different from when person dey tap ball for England. When e dey spain, e bin dey play to finish 4th/5th, now e dey play to win League, but the way e take carry himself make brain.”
IF WOUND DEY CATCH AM, E FIT PLAY LIKE THAT
The last two matches wey Manchester United play against Leicester and Bournemouth, na Bailly win Man Of The Match, but e remain small e for miss the match for Vitality Stadium on Sunday. After the match on Sunday, Mourinho bin reveal say the Africa Cup of Nations winner train only once before the kick-off. “E bin wound against Leicester, but e no yarn anything and e play 90 minutes,” na wetin the boss yarn. “The next day, e no fit train and na Saturday wey e train with the first team for the first time. E bin no fit train all week because of the wound…. But the truth be say e get power and e get skills.”
HIN NAME NA ERIC!
The fact say Eric dey the Ivorian name self (like Eric Cantona), dey make many Manchester United fans love am gan.
THE FACT SAY E STILL BE PIKIN – E FIT IMPROVE
Another reason wey make United fans yori yori for Eric Bailly matter, na say the guy na just 22-years-old. E mean say hin best years still dey ahead of am – and Jose Mourinho na the type of manager wey fit develop raw talent to full potential. Baba Special fit turn am to world class defender like the way e take develop John Terry at Chelsea, and Raphael Varane at Real Madrid.