Southampton wakka enter Old Trafford to face Manchester United on Friday night. The Saints bin think say dem go knack Red Devils onto say dem knack United 1-0 for the past two seasons under former manager Louis van Gaal.
Manchester United knack Southampton 2-0 as Zlatan Ibrahimovic destroy their yansh. The first goal wey e score, na Wayne Rooney do assist and the second goal na Penarity wey Luke Shaw win.
We wan sharply talk about the five things wey we observe for the match as the Reds sink Southampton inside Lagoon:
The first thing wey we observe na say Anthony Martial play rubbish. If say this French Winger for turn up, the match for end like 4-0 but e just dey think of Samantha when e dey inside pitch. Ball wey e suppose give Zlatan to score, e dey form stingyness. Oya score am yourself na, e dey shoot yama yama ball. The one wey pain me pass na that one wey Zlatan give am ball, e chest am down, to wipe shot, but hin brain con off and the chance waste. Abeg, if you sabi Samantha, go beg am o. Make she release Anthony Martial from where she tie am. If the 20-year-old continue like this, e no go tey when Henrikh Mkhitaryan or Marcus Rashford go bench am.
The second thing wey we observe na say Wayne Rooney na confirm Captain onto say e dey lead by example. The Skipper bin dey involved for the two goals wey Manchester United score tonight. Na him wey do assist for the first goal and e con allow make Zlatan play the penarity wey Luke Shaw win. After match, Zlatan even hail am, say the the England Captain dey epp everybody both on and off the pitch. Rooney na senior man.
The third thing wey we oberve na say Jose Mourinho no sabi hin strongest eleven. Right now ehn, nobody care self as long as say Manchester United dey wakka commot with three points. E bin dey obvious say the team never gel for first half. The first goal wey Red Devils score na against the run of play, though they con improve for second half, enough room till dey for improvement.
The fourth thing wey we observe for the match na say everybody for the United team dey ginger o. E be like say the winning mentality wey Jose Mourinho and Zlatan Ibrahimovic get don dey rubb off on the whole team. The kind attacking football wey i see today ehn, e remain small i for think say na Fergi era be this. The way dem take attack Saints defence, na God save dem say the match end 2-0.
The last thing wey we observe na say Paul Pogba and Maroune Fellaini combo make brain for midfield. Baba Fella dey do the basics while Pogba dey bring World Best material. If dem continue like this, Manchester United fit win League title this season.
My People, oya how una see the match? Wetin you observe?