Manchester United and Derby County don gree ontop matter wey consign talented pikin striker James Wilson, as the pikin dey wakka enter iPro Stadium to learn work (loan) for one whole season.
The 20-year-old, wey tear net four times out of the 20 matches wey e play for Manchester United senior team, dey wakka go join Nigel Pearson’s team as the Rams dey reason whether dem go fit fight for Championship promotion this season as dem go like begin tap ball for Premier League.
Wilson bin play hin first United senior team match under interm manager Ryan Giggs after Red Devils kick David Moyes inside dustbin when 2013/14 season wan finish. The best thing wey the 20-year-old do for United, na when e score two goals against Hull City for Old Trafford. When Louis van Gaal con enter, Wilson bin dey part of senior team, for first year sha.
For the 2015/16 season, e struggle to see chance to knack ball, so Baba Philo con loan am to Brighton & Hove Albion. Willo, bin tear net 5 times out of the 28 matches wey e play for them, as Chris Hughton’s Seagulls wakka reach play-off semi-finals.
After hin loan spell finish, Willo wakka enter back Old Trafford this summer, but as e see say Jose Mourinho don already get strikers wey their blood dey hot like Wayne Rooney, Zlatan Ibrahimovic, Anthony Martial and Marcus Rashford. The boy con fear, reason say e go make sense if e run enter Derby to build hin career.
This na wetin Derby County manager yarn ontop James Wilson signing.
“E sweet us say we don get James Wilson on loan o. I dey hope say this loan go benefit both parties wey dey involved sha and i wan thank Manchester United onto say dem allow make James Wilson wakka enter our club. Him na player wey get power and e go add to our attacking power.”
We dey wish am luck sha, e fit blow for there.