Usain Bolt don end hin Olympic career (e don retire from Olympics) as e collect hin ninth gold medal after Jamaica sink every other country inside lagoon for the 4x100m relay final in Rio. As everything be now ehn, e mean say Bolt don win ‘Triple Triple Triple’
Bolt, 29, don already win 100m and 200m in Rio but as e don win for relay too, e mean say him na the only man wey don win all three sprint events at three Games.
The people wey follow am run for Jamaica na Asafa Powell, Yohan Blake and Nickel Ashmeade. The time wey dem take use finish the race na 37.27 seconds.
The people wey finish second na Japan (Silver), USA bin think say dem carry Bronze but Olympic Officials talk say dem do ojoro, so na Canada win Bronze.
“As una don see am, na me be the greatest na,” na wetin Bolt yarn.
“I no go sleep early tonight o, i go party, i go jolly dey go. If person for tell me say i go become legend when i start, i for talk say na lie” na wetin Bolt yarn for BBC Sport.
“My team bin try wella for me tonight. As long as everybody bin do their part (dey pass baton), e sure say na we go win am.”
|Bolt’s Olympic ‘triple triple’|
|Beijing 2008||100m, 200m, 4x100m|
|London 2012||100m, 200m, 4x100m|
|Rio 2016||100m, 200m, 4x100m|