Manchester United’s right back, person wey hin teammate Ander Herrera hail as the ‘Best right-back wey dey this world’ don commot, yarn ontop hin role, Zlatan Ibrahimovic and Jose Mourinho.
E no consign Antonio Valencia with wetin hin teammate Ander Herrera yarn, say him na the best ‘right-back wey dey this world’ as e no dey eye individual success.
“ I dey grateful with wetin Ander yarn o, the way hin take hail me but wetin me dey try do dey simple, na to work hard every day for training,” na wetin Valencia yarn for MUTV.
“I wan try my best for United, team wey I dey yori yori for. Na everytime I wan try my best for this team. Individual success no consign me, at all at all.”
“But e dey sweet me say Ander fit talk that kind thing about me, but my own na to work hard.”
Antonio Valencia na one of the players wey don ball gan as Manchester United dey win dey go this season. The way hin take balance for No.2 role make sense.
Zlatan Ibrahimovic don benefit from hin services and Valencia talk say the Swedish Striker don bring new thing to United’s game.
“Now person dey inside box, wey we fit aim for,” Valencia still dey yarn.
“We all sabi who hin be, and we sabi say him don play well for all the clubs wey e wakka enter before e reach our bustop. Now him don start well for United and all of us here go try our best to epp am when we fit.”
“We sabi say we fit throw long pass to am onto say we know say e fit hold the ball well, and we sabi say e fit bring other wide midfielders into the game self. You know, e dey always make sense if you pass ball to am.”
As United knack Hull City for KCOM Stadium on Saturday, e mean say dem don continue their 100% start to the season under new boss Jose Mourinho.
The Portuguese don already bring back the ‘feel-good’ factor to Old Trafford.
“Everybody dey believe, everybody wan make ball dey their leg and na good sign. Everybody dey run hard, dey show movement things and e dey very important,” na wetin Valencia yarn.
“On wetin Jose dey advice us? Na the same for all the teams – always commot ontop pitch to knack person and say make we dey believe say we be Champions. We dey hope say we fit carry on like this.”
“From the matches wey we don play already, you go notice say we don tear net already so you fit appreciate say things dey go well.”
“We dey attack and we dey create many chances. We don also bring in players wey sabi ball and e don improve us too.”