The German midfielder name no dey the list wey Jose Mourinho submit to UEFA for Manchester United’s Europa League Squad, but hin name dey for Premier League squad.
Manchester United no chook Baba Schwein name for their Europa League squad. When the Reds bin dey bring out squad list for Premier League, hin name dey there but now wey dem don bring out list of the people wey fit tap ball for them, for Europe, hin name no dey.
So e mean say e no go tap ball for Group stage against Feyenoord, Fenerbahce and Zorya Luhansk.
The former Bayern Munich midfielder never play any match under Jose Mourinho. E don dey train wirh reserves self. Baba Special tell am say e fit leave Old Trafford if e want, but Baba Schwein talk say him no dey commot go anywhere, say e wan fight for shirt.
Mourinho don already admit say e go hard for Baba Schwein to tap ball for the club again.
Even small pikins like Timothy Fosu-Mensah and Axel Tuanzebe dey the list for United’s Europa League squad.
Fosu-Mensah bin play Jose Mourinho’s first match against Wigan but e never play since then under the new manager.
Last season, Louis van Gaal bin promote Tuanzebe, 18-years-old, to first-team squad. Baba Special even include the pikin for hin pre-season tour wey happen for China.
The first match wey United get for Europa League go happen on September 15.
This na Manchester United Europa League squad
David de Gea, Sergio Romero, Sam Johnstone
Eric Bailly, Phil Jones, Marcos Rojo, Chris Smalling, Luke Shaw, Timothy Fosu-Mensah, Antonio Valencia, Matteo Darmian, Axel Tuanzebe
Paul Pogba, Juan Mata, Jesse Lingard, Michael Carrick, Daley Blind, Ashley Young, Ander Herrera, Henrikh Mkhitaryan, Marouane, Fellaini, Morgan Schneiderlin
Memphis Depay, Zlatan Ibrahimovich, Wayne Rooney, Anthony Martial, Marcus Rashford