As una sabi say clash of the titans (Manchester United v Manchester City) go happen to kick off the Premier League on Saturday, Reds manager Jose Mourinho don yarn hin mind ontop the derby wey go happen.
Baba Special talk say everybody full ground for the derby, nobody don woundjure. Even Mita Mita self wey bin wound for international duty with Armenia don dey fit to play small for the match.
The Reds boss talk say Mita Mita dey fit, say e no dey try talk say the guy dey 100% fit.. But the koko na say d guy go epp us.
“Everybody dey fit, dem dey ready and their body dey hungry dem to tap ball for the derby,” na wetin Jose Mourinho yarn for the press conference wey hin do for MUTV.
“I sabi say this derby match dey very important to Manchester United. If person wan blow for here, e gots win this kind match.”
“E go hard now ehn. If say Aguero dey play, we go sabi their formation… Them get many people wey fit play dat position.”
Mourinho con yarn hin mind ontop the impact wey Zlatan Ibrahimovic get for Red Devils.
“For all the clubs wey him don wakka enter, e dey leave hin Zlatan signature. E no matter d manager, him na winsh player,” na wetin the Boss yarn.
“E bin no want Chinese money or American US Dollars, E bin wan tap ball for d hardest League wey dey this world.”
“Nobody for the club fit ginger Zlatan spirit, Baba God don give am natural ginger.”
The Boss con talk say the target for United gots dey different onto say na BIG club:
“When you wakka enter club like Manchester United, You no fit dey talk say u wan defend, You gots dey direct and yarn say we wan win the title.”
Baba Special talk say everybody dey calm ahead of the Manchester derby: “We dey kampe, we dey wait.”