The Red Devils boss bin dey vess with the decisions wey the Ref make today, but e publicly blame Luke Shaw for the goal wey Juan Zuniga score.
Jose Mourinho talk say the main person to blame for the defeat na Luke Shaw as Manchester United bin lose their third straight match in a row.
The Red Devils boss bin dey vess for the ref Michael Oliver self, ontop say the first goal wey Watford score bin start from the harsh tackle wey Miguel Britos give Anthony Martial. So according to Jose Mourinho, na the refs dey at fault for the defeat against Manchester City, Feyenoord and now Watford.
But now Mourinho don also blame England left-back Luke Shaw, e talk say e no know wetin do Luke Shaw brain, say why the guy no close down Nordin Amrabat…. say na Shaw wey cause the goal wey Juan Camilo Zuniga score for the 83rd-minute.
“The second goal wey Watford score, when Amrabat collect the ball, our left-back bin dey 25 metres away from am, hin suppose dey 5 metres now. Bur even as hin dey 25 metres, instead of am, to rush to press am, e just standa dey look like mumu,” na wetin Mourinho yarn.
“I know say na tactical issue but mental issue dey inolved. No be something wey we fit fix sharp sharp like that, but we go work on am.”