Everything to Ginger Una For Manchester United vs Leicester City

Manchester United vs Leicester City

Leicester City go dey carry their two left leg enter Old Trafford this Saturday for the EPL match wey dem wan follow us tap ball. The match go dey happin bt 12.30 p.m and as usual @manutdinpidgin don standa gidibam to give una all the tori wey go dey shele before the match start, as the match dey happin and even after the match tori sef follow join wettin we go dey yarn una on top twitter. Our ogbonge celebrity visitor Ruggedy Baba dey feel us wella and we self dey feel hin flows so, hin go still follow us yarn again this weekend. So make una sharply go purshue us and make una tell all una padis sef so dem fit follow jollificate.

Kai Manchester United players don do plenty falling of hands for us but we thank God say the EFL match wey we bin play against Northampton Town for Wednesday be bring small shinkini smile come our face. The match be show plenty plenty things wey we don yarn since like why Oga Jose need cast better iron chair for Papa Kai make he sit down dey re-boot hin operating system like computer, why Bros Carrick na the senior man wey go steady our midfield, why Herrera need play as 8 or 10 for that our midfield, and last last say na this two players go make us fit enjoy Pogba for that midfield so Bros Ibra self go fit dey see ball wella.

Nobody talk say Papa Kai never try for Manchester United but na so so rubbish and nonsense hin dey do so by the time hin sit down for hin iron casted bench small and hin operating system don re-boot den we go accept am back for pitch.

Small Tori Tori about Dis Match

For our side Anthony Martial no go dey for the match because of woundjure wey hin be get-he never even tap ball wella for us this season so make he use this hin rest time take borrow himself brain unless bench dey call hin name. Luke Shaw and Henrikh Miki-Miki don standa wella to play after all their ajebo woundjure be commot.

For Leicester City, their goalie Kasper Schmeichel don well from head woundjure wey he get but another ajebo woundjure catch am so hin fit no dey. Marcin Wasilewski no go play as hin be play rough for Tuesday for EFL cup and dem give am our colour-red card.

Proper Proper Match Tori

Head-to-Head

  • We dey unbeaten inside 7 home league games wey we don tap ball against Leicester. The last time wey dem beat us for houseinside 18 matches na 1998 wey one Tony Cottee be score for them-abeg make e just continue like that because na so we talk for Watford.
  • The 3 times wey Leicester be beat us for house inside their 6 winning na before Second World War.
  • The only time wey dem flog for 16 meetings for all competitions na September 2014, wey dem scatter us 5-3 for Premier League-things don yama for us sha.

Manchester United

  • Oga Jose Mourinho fit chop three back to back league defeat for the second time inside hin career, the first time na with dem abegros last year.
  • He don lose 12 of hin last 23 league games as Oga. The last time wey hin be lose 12 he don play over 110 games.
  • Manchester United never lose two of our opening three games inside Old Trafford for league season since 1986-87.
  • Bros Zlatan don score inside six back to back home league showings and he don score 12 goals.

Leicester City

  • Leicester City never win inside their last four matches wey dem waka go another person stadium. Dem fit lose three away matches back to back for the first time since December 2014.
  • If them lose, dem for don equal all the loses wey them be get for the whole last season.
  • Islam Slimani (na tear rubber pikin) don tear net 22 times inside 23 league showings for 2016, and nine na headers-the guy blood dey hot oh.
  • Jamie Vardy don tear net inside three of hin four games against Manchester United for all competitions.
  • Claudio Ranieri never lose any of hin four last games against any team wey Oga Mourinho dey manage (W2 D2)-chai wahala dey oh.

 I no go lie say me dey fear and my heart dey beat like horse wey dey run 440 but I still believe say we go win the match even if na by ojoro. Una fit yarn una mind for wettin una dey expect for the match.

 

 

 

Advertisements

One thought on “Everything to Ginger Una For Manchester United vs Leicester City

Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s