Today na good day o, The way Manchester United ball fire as dem knack Leicester City apako (4-1) sote the defending Champions wan shit for pant, shock me. The thing wey sweet United fans pass for the match na say the Reds do am without Wayne Rooney as the Reds Devils captain bin start for bench.
The people wey score for Manchester United na Chris Smalling, Juan Mata, Marcus Rashford and Paul Pogba. The person wey score consolation goal for Leicester na Gray. We sharply wan talk about the five things wey we observe for the match as Jose Mourinho’s men demolish Leicester City:
The first thing wey we observe na say Manchester United bin play attacking football for first half. Leicester City no fit cope with the way Marcus Rashford, Jesse Lingard and Juan Mata dey run at them. Daley Blind and Antonio Valencia con make matters worse for Leicester onto say dem two overlap gan today. At first, the Defending Champions bin dey try, but as soon as Chris Smalling off their pant, all the other goals just dey enter as if say dem goal na water.
The second thing wey we observe for the match na say Paul Pogba and Ander Herrera midfield combo make brain today. The person wey play deep na Herrera and e con give Pogba room to go foward and express himself. Fashi say everybody dey praise Pogba today, Herrera try wella, na him do all the dirty work and na him wey start almost all the attacks wey United do today.
The third thing wey we observe na say Manchester United no miss Wayne Rooney at all. When line up bin commot, and fans see say Jose Mourinho put hin captain for bench, many people con dey talk say na bold move. Some people even believe say United go struggle without am, but make i dey honest, the way United ball for first half, Wayne for dey fear ontop bench because na the best half wey Red Devils don play this season and hin no dey involved.
Another thing wey we observe na say Daley Blind don threaten Luke Shaw’s left-back position. The way the versatile United player tap ball today ehn, e shock almost everybody ontop pitch. E get hand for almost all the goals wey United score today. Hin corner kicks na die!
The last thing wey we observe na say Juan Mata ball die for the number 10 role wey e play today. E balance wella ontop pitch. Na him wey score the second goal for the match, but no be him wey score the best goal for the game as the wan wey Gray score, pass hin own. The way this guy take link up with Paul Pogba, Ander Herrera, Rashford and Lingard make brain. E ginger for attack wella. Even the goal wey hin score, na him start the move. Make we dey see if Mourinho go bench for the next game, or e go give am the No.10 role again.