Ilkay Gundogan don slam Jose Mourinho, say the way Baba Special dey treat hin former Germany team-mate Bastian Schweinsteiger no make sense, say “e no get respect”.
Mourinho don banish Schweinsteiger since the time wey e take over at United from Louis van Gaal. The former Germany captain dey even train with small pikins and Jose no gree make e train with senior team.
Although Manchester United bin register Baba Schwein among their Premier League squad, e never play any match for Jose Mourinho and the way things dey go, things no go change.
Manchester City midfielder Gundogan , wey tap ball along side Schweinsteiger for Germany don commot yarn hin mind.
“If everything wey una dey hear and read dey true, den you fit take say Mourinho no get respect,” na wetin Gundogan yarn.
“Him no be anyhow player, and no be say na small pikin. I believe say Manchester United fit benefit from person like Bastian Schweinsteiger if e dey fit.”