As una sabi say Jose Mourinho and hin men dey carry their legs wakka enter Anfield to face Liverpool on Monday night. Baba Special don sharply run hin press conference ontop the matter today.
“Na Big match o. Person fit compare am to Inter v Milan, Real v Barcelona even Porto v Benefica self- Na why i like am. “ Jose dey yarn.
Jose Mourinho don yarn for #MUTV, say all the Manchester United Players wey wakka go international break, don come back strong, say dem full ground.
The Boss yarn say Hernrikh Mkhitaryan and Luke Shaw dey available for Liverpool match.
Mourinho ontop Rooney: “See ehn, if England like, make dem enter gutter, e no consign me. Baba Roo dey prepared, e dey train and e dey positive.”
Jose on Lingard and Herrera: “E sweet me say my players dey waka go represent their countries for national level. E dey make my head swell. Especially if na these two una dey talk about. One bin play hin first match and the other one, na hin first call up.”