Burnley go dey waka come Old Trafford today, as we go dey play our first 3:00pm kick off for league this season. And those of una wey sabi know say @manutdinpigdin standa gidibam to yarn una all the tori wey join concern this match on top twitter. The tori so follow for everything wey go dey happin before the match, during the match and after the match. If this na your first time to and you wan enjoy all the better tori about this match and all other matter as e join for Manchester United matter, sharply go purshue for twitter for @manutdinpigdin. You still fit go like our: page for Facebook, pictures for Instagram and even our videos for YouTube and the handle for everything na one and the same @manutdinpigdin. No forget oh na we be the number area for all the tori wey join for Manchester United matter for our country man language…another one na copy copy.
Well make I no lie give una as my belle sweet me wella when we be knack Manchester City 1-0 for that EFL Cup. Belle kon even over sweet me as e be say na Juan Mata be tear net that day as hin show Jose hin sabbiness for that match. Some bad belle people dey yarn one talk wey be like “fly noise” for my ear: say Man. City no carry correct team say na so so smallie be full the team wey we play (abeg who send dem……mtchew). Another person wey be make my head swell na Senior man Carrick as hin just dey do “commander-in-chief” for that midfield. Abeg make dem play better for this match so belle go fit over sweet me again.
Small Tori Tori about dis Match
For our side, Eric Bailly no go dey as hin still get wondjure wey hin carry for that match wey we follow Chelsea play. Chris Smalling and Bros Rooney fit play the match if their body don standa wella.
For Burnley side, Andre Gray go dey after hin don serve hin punishment finish for the bad thing wey hin talk for social media. George Boyd don well from wondjure wey hin sef get but e never sure if Steven Defour go don ready for the match.
Proper Proper Match Tori
- Manchester United never chop am for house inside the last 12 matches wey dem follow Burnley tap ball (W8, D4). The last time wey dem win for Old Trafford na September 1962.
- Burnley be knack Manchester United 1-0 for the first Premier League game wey dem play for Turf Moor but dem never win inside 3 games (D1, L2).
- Dem don win only one inside their last 6 league games (D2, L3);
- Dem get only 14 points from 9 matches-the only time wey dem no get better start na for Premier League na for 2014-15 season wey dem get 13 points;
- Oga Mourinho don throwey 13 matches inside hin last 27 Premier League games (W9, D5), after hin don throwey only 13 inside hin former 119 games before this hin yama yama run be start (fasting and prayer things on top this matter);
- Bros Zlatan never score inside 5 back to back league games for the first time since 2010 (the matter go soon change).
- Dem don win 3 of their first 9 games this season, after dem be no win any of the first 10 last season;
- Dem never carry any point away from home dis season as dem don lose 3 back to back away games inside league and them open yansh 3 times each inside all this matches;
- Dem only they manage two shots on target per Premier League and them be the lowest inside league. Away from home na only 3 shots dem don manage throughout this season;
- Sam Vokes (who he be) don tear net inside back to back Premier League matches after hin don tear net only one time inside 33 games before.
For me this na match wey we suppose tear net left, right and centre. But make we no play with the match oh before e go turn another Stoke City for our head.