O Boi, no be small frustration wey happen today as Burnley FC bin hold Manchester United to a goaless draw. The thing pain pass the knacking wey Agberos give us last week. Fashi say Ref bin dey on Burnley side, and Ander Herrera bin see red card for the match, the way United take miss chances today ehn, i no believe am.
Make we just yarn about the five things wey we observe for the yama yama match:
The first thing wey we observe na say Jose Mourinho dey worship Zlatan Ibrahimovic. The fact say Mourinho bin remove hin deadliest threat in the match (Juan Mata) and e replace am with Iroko tree (Fellaini) even after all the rubbish chances wey Zlatan miss, dey show say even if Zlatan shit ontop pitch, Baba Special no go commot am. For this match, Zlatan bin miss one on one, free header, empty net, etc… Wetin Papa no miss today self? This man wan destroy us.
The second thing wey we observe na say the match bin dey cry out for Michael Carrick, midfielder wey get experience. If say Baba Caro for start today, e sure me say with all the possession wey we see, e for don throw one pass wey go unlock the Burnley team but Baba Special just leave am for bench, dey waste.
The third thing wey we observe today na say the chances wey Zlatan Ibrahimovic, dey make fans yab Paul Pogba. Zlatan Ibrahimovic don rob Paul Pogba of five assists this season. For this match, all the balls wey Paul Pogba give am, the guy waste am. The thing dey frustrate person.
The fourth thing wey we observe na say Mike Clattenburg bin dey support Burnley FC. Only am, commot eye for all the penarity shouts wey United suppose see. That time wey dem foul Darmian inside box, all the hand balls wey Keane just dey do inside box, e commot eye. To make matters worse, e con give Herrera red card. Complete bias ref.
The last thing wey we observe today na say we don commot for Premier League title race till further notice. We dey siddon for Eight for table right now, even Watford don gap us for table self. Jose Mourinho dey bring shame to my club, make e fix things or United fit sack am. Louis van Gaal no do like this.