Everything to ginger una for Manchester United v Arsenal: Na must win for Jose Mourinho


The last time wey Arsenal wakka enter Old Trafford, na Marcus Rashford destroy them

Arsene Wenger and hin Akagum FC players dey wakka enter Old Trafford to face Manchester United on Saturday. Now wey international break don finish, the Red Devils go dey reason say dem fit continue from their fine display against Swansea when the Gunners enter the Threatre of Dreams. The match go happen on November 19th 2016 by 1:30 pm. Our Official Handle @manutdinpidgin don standa wella to give una all the match tori wey join about this match including the Build Up wey go happen with Nigerian Rap Artiste Ruggedy Baba. We go dey torchlight matter on the tori wey go happin before the match go start, as the match dey happin, and even as the match end.

Before that Swansea victory wey happen last two weeks, na so so rubbish wey Manchester United dey play for Premier League, na why dem dey siddon for 6th position. This match na must win for Jose Mourinho because if e lose am, wahala dey o. Arsenal on the other hand, dey do well for Premier League, but their last match na draw against Tottenham so dem dey siddon for 4th position for the table.

One key player wey don woundjure for Arsenal na Hector Bellerin. E don get ankle wound, so e go dey out for up to 4 months. E mean say e go miss the match. While Zlatan Ibrahimovic no fit play the match as hin dey suspended as Papa don collect too many yellow cards. Many Red Devils fans bin dey happen when Alexis Sanchez woundjure but e be like say the guy dey fit to face United. E bin represent Chile during international break and e score two goals self.

As Zlatan no fit play the match, Jose Mourinho get big decision to make: Whether e go use Wayne Rooney as Striker or whether e go start Marcus Rashford for there. We go prefer if Jose pick Rashford sha, because the last time Arsenal enter Old Trafford, na the small pikin sink them enter lagoon. We bin hear say Rooney wound, na why e withdraw from the England squad but Sky Sports don confam say hin go dey fit to face Arsenal. Another player wey go dey pray to see chance against Arsenal na Henrikh Mkhitaryan, e try wella during the international break.

Proper Proper Match Tori


  • Arsenal don win 1 of the last 4 league matches wey dem don tap against Manchester United, that 3-0 victory wey happen for Emirates Stadium last season.
  • The last time wey United face Arsenal for Old Trafford, na 3-2 the match end, wey Rashford score two and Herrera score one.
  • The last 11 matches wey Arsene Wenger don face Jose Mourinho for League, Jose don win 5 times and the remaining six times na draw.


  • Arsenal don win 7 matches, dem draw 3, den na only 1 wey dem don lose. (W7, D3, L1)
  • Arsenal don score 24 goals for League this season, dem don concede 11 goals.
  • Arsenal get the best away form so far this season. Dem don win four (4), and draw one(1).

Manchester United

  • Manchester United don win 5 matches, draw 3, lose 3 so far for League this season.(W5, D3, L3)
  • Manchester United don score 16 goals, but them don concede 13 goals. So their goal difference na +3.
  • So far, the Home form of Manchester United no tap this season. Dem don win 2, draw 2 and lose 1. (W2, D2, L1)

I believe say if Jose Mourinho no use defensive approach, Manchester United fit knack Arsenal. Make una drop una own predictions inside the comment box.


2 thoughts on “Everything to ginger una for Manchester United v Arsenal: Na must win for Jose Mourinho

Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )


Connecting to %s