Five things wey we observe as Manchester United knack Feyenoord 4-0: Mkhitaryan na winsh


Na Wayne Rooney score the first goal against Feyenoord

When Feyenoord players carry their two koro koro legs enter Old Trafford on Thursday night, if person for tell dem say dem go chop Four(4) kondo, dem for talk say na lie. But like play like play, Manchester United knack dem apako (4-0 )sote, e remain small dem for pant. The people wey score for Red Devils na Wayne Rooney, Juan Mata, Brad Jones (Own goal) and Jesse Lingard. The truth be say this na one of the best performances from Jose Mourinho’s men this season. We just dey hope say dem fit play like this for Premier League.


The way Wayne Rooney chip keeper make brain

We sharply wan talk about the five things wey we observe for the match.

The first thing wey we observe na say Henrikh Mkhitaryan na winsh. The guy sabi play ball, ahan… The guy bin dey involved for almost all the United attacks wey happen tonight. E show Feyenoord players pepper. One of their players suppose collect red card because of the Armenian international but the ref commot eye, do like say hin no see the challenge. The only thing wey pain me for the match, na say e no tear net because e deserve am.


Na Zlatan Ibrahimovic do assist for Wayne Rooney

The second thing wey we observe na say Paul Pogba and Michael Carrick na the best midfield combo wey Jose Mourinho get right now. Anytime wey Carrick play self, Paul Pogba game go dey balanced as e go give the French international the room to operate more. Out of all the matches wey Carrick don play this season, na only one wey United draw (against Arsenal), the rest na Wins. Thank God say Jose Mourinho no use Iroko tree tonight.

The third thing wey we observe na say out of all the matches wey Manchester United don play this season, this na the best so far. Everything about the game tap ehn. From our keeper, Sergio Romero wey make two outstanding saves. To the back four, wey keep clean sheet. To the midfield wey control game, to the attackers wey worry Feyenoord defence from start to finish. Wayne Rooney bin dey on mad form tonight self. E don silence hin critics again.


Juan Mata don improve in Manchester United sha

The fourth thing wey we observe na say Jose Mourinho’s team bin dey very direct tonight. For the previous matches wey United don play this season, if dem dey lead for first half, den dem go wan play defensive game for second half. But tonight, everything bin dey different. The Red Devils bin attack Feyenoord from start to finish (Na chance after chance). Na wetin person wey get sense dey call ‘Good Football’….

The last thing wey we observe na say Phil Jones don try so far since hin return to first team football. Na only once wey person dribble am tonight but Romero save am, as e no gree make dem score. All round, the guy dey very solid. We just dey pray make e no woundjure again.


Wetin you think?

Fill in your details below or click an icon to log in: Logo

You are commenting using your account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )


Connecting to %s