O Boi, Today na must win for Jose Mourinho and hin Manchester United men as West Ham players dey wakka with their korokoro leg enter Old Trafford Stadium. E sure me say the thing wey go dey behind our players mind, na say these na the people wey stop them from playing Champions League football, so dem fit use vess play West Ham today. The koko be say, even if dem no wan revenge, make dem sha win because if dem go draw today ehn, dem fit no make Top Four as the gap between them and the leading pack (Chelsea, Man City, Liverpool, Arsenal) don dey wide.
How una go fit follow the match?
Make una no worry, we go run live commentary ontop our official twitter handle @ManUtdinPidgin. You also fit like our facebook fanpage ‘Man United in Pidgin’ and you fit purshue us on Instagram (@ManUtdinPidgin) for the best Caption pishures after the match.
How everything take be?
The moral don dey high among our players after dem knack Feyenoord 4-0 for Europa League. Before that one, na the 1-1 draw wey dem play against Arsenal, match wey dem suppose win onto say dem ball Arsenal gan. So Jose Mourinho’s men dey in fine shape aheaad of today’s match. On the other hand, West Ham bin lose against Tottenham for their last match, match wey dem suppose don win but Harry Kane score two late goals to snatch the three (3) points from them. The only hope wey West Ham go get today na say, United no fit beat them for League last season, so dem fit wakka enter Old Trafford with confidence.
Who and Who fit start today?
Manchester United manager Jose Mourinho don already admit say Henrik Mkhitaryan fit start against West Ham today, after the fine display wey e put up against Feyenoord mid-week. The only people wey don wound for the Red Devils na Chris Smalling and Eric Bailly, so e mean say Jose get selection headache for today’s game. For West Ham, Winston Reid go miss the match onto say e bin collect red card for their last match (against Tottenham), Andy Carroll go miss the match self, e get wound. Our Academy graduate Ashley Fletcher fit play sha.
Wetin our players don yarn before the Hammers match?
“Everybody sabi say the match dey important. Na the way the Premier League take be and you fit see say everybody dey close to eachother for League table. This three points wey una dey see today,we need am and na wetin we go fight for.” – Daley Blind
Wetin West Ham people dey yarn?
“Them play well for Europa League, but dem need points for Premier League so the match dey important for both teams. We sabi say anytime wey person dey play United away, e dey hard.” – West Ham boss Slaven