Everything to Ginger Una for Everton vs Manchester United

Everton vs Manchester United

Yes oh, the league don show again and the next game for Manchester United na against Everton for Goodison Park. The match go dey happin for Sunday by 5:00pm for 9ja time. As una sabi we for @manutdinpidgin go dey yarn una all the tori about the match on top our twitter page so make una sharply go purshue us for twitter so una go fit enjoy all the tori wey join for the match. No be only dis match matter we dey yarn oh as na we be the number one correct confirm area for all ogbonge  tori as e join for our darling club Manchester United matter. So if you don dey slack before, just sharply purshue us for twitter on top @manutdinpidgin so you for no slack again. You fit still like our page for Facebook, our pictures for Instagram and our plenty ogbonge videos for Youtube……our handle never change na still @manutdinpigdin and na we fit dey sama you with all the better better tori wey join for Manchester United matter for our country man language.

This match don dey make me dey think, as I no just understand if na jazz dey worry us or if another thing don join the matter wey be say anytime wey we play inside other competition, we dey scatter all the team wey jam us but if we enter league we dey be like person wey cold dey catch wey dem kon still follow pour cold water for hin body. See the way we take sama West Ham for Wednesday like say no be them we follow play for Sunday for inside the same Old Trafford…..if no be say I use my two korokoro eyes watch the two matches I for dey argue say na lie.

But make we leave dirty for lawma…..that match for Sunday don go and our guys be make our belle jollificate for Wednesday own. Martial be ball for that match and hin be show some of the abinibi wey hin get for that match in fact make hin just dey ball like that till season go finish. Bros Zlatan sef be do better for the match even Bro Rooney no dull for the match as hin ball wella. But the person wey be sweet my belle pass na Henrikh Mkhitaryan as in….hin just dey ball for that match like say nah in carry West Ham players come the field….make Oga Mourinho use hin sense well make hin start am for this match.

Small Tori Tori about Dis Match

dega save vs everton.jpg

For Everton side, their midfielder James McCarthy go dey for the match after hin be come back from hin wondure. Muhamed Besic and Matthew Pennington no go dey.

For our side, Bros Rooney no go dey as hin go dey serve punishment for the yellow card wey hin collect for the match against West Ham. E never sure if Luke Shaw go dey after hin be do one leg up for the same match. But Paul Pogba and Marouane Fellaini go dey after them don finish the punishment wey no allow them tap ball for Wednesday.

Proper Proper Match Tori


  • Manchester United be win all the 3 games wey dem be jam Everton last season and the one wey recent pass na that FA Cup semi-final for Wembley stadium wey Anthony Martial be tear net for dying minutes.
  • United don chop 15 Premier League wins for Goodison Park; we never chop winning like this for another team house since League start for 1992;
  • But Everton don win 3 commot from the last 4 Premier League games wey them don follow United tap for Goodison Park.


  • The Toffees (e be like name of sweet) don win only one inside the last 8 matches wey them don tap for league (W1, D3, L4);
  • But them join for the 4 sides wey never chop am for house this season (W3, D3)-that one must end for Sunday;
  • Them don keep only one clean sheet inside their last 9 game weeks;
  • Them don dey lose for half-time inside 4 of their last 5 league matches but na for only inside 1 of the former 8 that kind thing take happin before-make e continue for Sunday;
  • Them no sabi move inside match at all; na for only one match them move pass their opponents for Premier League this season;
  • Romelu Lukaku don play 6 league games for Everton against Manchester United and hin never score.

Manchester United

  • This 20 points inside 13 games na lowest for Manchester united since 1990, when them be start season like this; them be lose the 14th match that year-God forbid rubbish;
  • Manchester United don win only 2 times inside their last 10 league games (W2, D5, L3);
  • Na only inside 4 matches we don score pass 1 goal for inside 13 league games-God abeg blind all these keepers wey dey form Super Mario;
  • Mourinho don lose 3 of hin first 13 league matches as Manchester United manager but hin 4th defeat as Chelase oga happin for hin 68th league game;
  • No two player don create chances for each other inside league pass Zlatan and Pogba (16)-make them start to dey score these chances abeg.

If we play better ball and we score our chances, we suppose win this match. Una fit drop una predictions for the comment box for down. #GGMU




Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )


Connecting to %s