Everything to Ginger Una for Manchester United vs Tottenham

Manchester United vs Tottenham

My fellow Manchester United fans, another Premier League match don show and the team wey Manchester United go jam for this weekend na Tottenham. The match go dey happen for Sunday by 3:15 pm for Nigerian time. Una know say we for @manutdinpidgin don standa gidi gbam to yarn una all the tori about the match on top our twitter page so make una sharply go purshue us for twitter so una go fit enjoy all the tori wey join for the match. And for una wey no sabi us wella, na we Manchester United in Pidgin and na we be the number one correct confirm area for all ogbonge  tori as e join for our darling club Manchester United matter. So if you don dey slack before, just sharply purshue us for twitter on top @manutdinpidgin so you for fit dey enjoy better tori about our darling club for our own country man language. You fit still like our page for Facebook, our pictures for Instagram and our plenty ogbonge videos for Youtube……our handle never change na still @manutdinpigdin.

Our form for league just dey confuse me, make I no lie the boys dem dey try and dem don dey tap better ball but e be like say some people just sidon on top the 3 points wey we suppose dey pack for league and dem kon leave draw matter for us. In fact we don even start to draw pass okoro soup with the way we dey daw inside league matches. But I no go lie sha that our last match, Iroko Fellani be join for the reason wey we be draw that match though our boys sef for try tear net after the first goal make the match for balance small.

But the way wey we take tap ball for Thursday inside Europa make brain die…..Bailly just enter for that back like commander-in-chief wey hin be, and Bros Zlatan just dey tear net go and oga Miki don dey tap better ball and hin don dey compose wella for match and hin don kon finally tear net for hin first goal, make hin just continue to dey flow like this.

Small Tori Tori about Dis Match

Stats for Manchester United vs Tottenham

Our commander-in-chief for defence Eric Bailly fit start hin first match for league after hin be woundjure for October after the way hin tap ball for Thursday. Chris Smalling and Luke Shaw still get woundjure, but oga Michael Carrick and Bros Antonio Valencia suppose dey this match as dem no follow the team travel go Ukraine so dem fit rest wella.

For Tottenham, Toby Alderweireld go join for the match has hin be play for their match against CSKA Moscow after hin be return from woundjure sef. But Erik Lamela and Vincent Janssen no go dey.

Proper Proper Match Tori

Head-to-Head

  • Manchester United don win only 2 of their last 8 Premier League matches wey we follow Spurs tap (D3, L3);
  • But Tottenham sef don chop am 19 times for Old Trafford inside Premier League-na the highest dem don chop away from house (dem go still am because dem never belle full);
  • United no chop am for Tottenham hand for inside 22 games wey dem tap between 2001 and 2012, dem be win 17 and dem be draw 5;
  • Spurs don win only 2 of their last 26 league matches for Old Trafford, for September 2012 and for New Year Day 2014.

Manchester United

  • United don win only one inside the last 8 league matches, and dem don draw 6-dis okoro thing gats stop;
  • This point of 21 from 14 games na the joint-worst for this stage inside Premier League season;
  • Bros Zlatan don tear net 71 times inside 70 league home wey hin show for since the start of 2012-13;
  • Wayne Rooney dey find one goal to equal Sir Bobby Charlton record as Manchester United’s all-time leading scorer with 249 goals for all competitions.

Tottenham Hotspur

  • Spurs never win any away match inside 4 Premier League matches wey dem don tap since dem flog Middlesbrough for 24 September-make e just continue but we no want draw;
  • Mauricio Pochettino never win any of hin 4 league matches for Old Trafford against any oga for Manchester United;
  • Harry Kane don tear net against 21 of the 24 Premier League teams wey hin don jam but hin never tear net against Manchester united inside the 5 matches wey hin don jam the team.

We gats find how we go win this match especially this one wey we dey hear say Leicester City dey flog Manchester City anyhow. We gats collect 3 points so the points go reduce……I believe say we go win. You fit drop your own prediction for the comment box wey dey below …..#GGMU.

 

Advertisements

Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s