This na the period for the League where games just dey fly from left, right and centre and if team no stand wella other teams go just dey fly am for table. For our own team Manchester United the next game wey dey for our agenda for this period na against West Brom by 6:30 p.m today Nigerian time for the Hawthorns wey be West Brom domain.
@manutdinpidgin go dey give una all the plenty tori of the match before the match start, as the match dey happin and when the match finish for our twitter page. So if you no fit watch the match or you still wan dey follow tori about the match as you dey watch am, we standa gidi gbam here for you. and you fit still like our picture for Instagram and our videos for Youtube and our Facebook page as the matter dey hot…… our handle never change na still @manutdinpigdin.
Finally oh…..we don start to get better ginger for our matches as we be win back-to-back league matches as we knack Tottenham and Crystal Palace and we don dey purshue all those people wey dey on top for table bumper to bumper. We don even dey gather unbeaten record as we never chop am inside 7 Premier League matches. Our players don dey show better sabiness and even players wey no perform before don dey ginger wella to make everybody happy. Bros Zlatan and Pogba don dey form deadly partnership wey we don ginger for and for all the aproko people wey dey yarn anyhow, make dem know say all the 9 goals wey Bros Zlatan don score so far for league this season don gather us 8 points. So hin don dey show better promise.
Small Tori Tori about Dis Match
For West Brom side, our former pikin Jonny Evans fit no dey the match as hin never well from hin woundjure and hin be miss their win against Swansea. Craig Dawson go dey the match as hin don serve hin punishment finish.
For our side, Henrik Mkhitaryan “Miki-Miki” no go dey the match but Antonio Valencia and Chris Smalling go dey this match but Eric Bailly no go dey as hin get wondjure.
Proper Proper Match Tori
- West Brom don flog Manchester United 3 times inside the last 6 league games wey dem don jam after dem no gree win inside the last 18;
- But Manchester United don flog dem 9 times inside the last 12 league visits wey dem play for The Hawthorns, and na only last season dem be lose;
- If Albion win, e go be the first time dem go flog Manchester United back-to-back for their house since 1980.
West Bromwich Albion
- The Baggies dey find way to equal their Premier League club record of 4 back-to-back wins for their house-e no go happin for our head;
- Na only one game dem don lose inside 6 league games;
- West Brom don tear net 9 times with headers inside Premier League this season, na dem and Crystal Palace get the record together-our defence don ready for dem wella;
- Tony Pulis fit be the 4th oga after Alan Pardew, Mark Hughes and Pep Guardiola, wey go win pass 2 league games against Oga Jose Mourinho;
- Salomon Rondon don tear net 16 times inside Premier League since last season start-hin don do am 11 times pass any other West Brom player.
- Manchester United get only one lose inside their last 11 league games (W4, D6);
- United dey waka enter this game form back-to-back wins inside league-the best form wey we don get after we be win our first 3 games of the season;
- If Manchester United be lose this match, dem for don equal their lowest points tally after 17 matches of a Premier League season: 27 in 1992-93 and 2001-02;
- Bro Wayne Rooney don tear net 7 times and hin don assist 4 times inside 9 league showings against West Brom. He need one goal to equal Sir Bobby Charlton’s club record of 249 goals inside all competitions.
I dey predict say we go win by 2-1. You fit drop your own prediction for the comment box wey dey below…….#GGMU.