Today na good day for Manchester United fans as the Red Devils knack Tony Pulis and hin West Brom team apako (2-0). The person wey score for United na Zlatan Ibrahimovic, the people wey do assist for am na Jesse Lingard and Wayne Rooney.
As everything be now, Jose Mourinho’s men still dey siddon for 6th position with 30 points but the good news be say dem don close the gap on Arsenal, Tottenham, Man City and Liverpool. As Arsenal go face City tomorrow, e mean say person must drop points. On Monday, Liverpool go face Everton and we dey pray make dem drop points.
We sharply wan talk about the five things wey we observe for the match:
The first thing wey we observe na say Manchester United dey defensively solid. The fact say na clean sheet self go tell you say our team don dey try for defence matter. Another good news na say David de Gea no stress himself today, as Marcos Rojo and Phil Jones try wella to clear everything wey West Brom throw at them. Even Darmian self bin try defensively, dey get one important block wey hin make inside our box wey for be goal, if no be for hin body. All round, our defence na die.
The second thing wey we observe na say Zlatan Ibrahimovic dey silence all hin critics, the people wey talk say hin no go shine onto say e don old, say e go end like Falcao… But the guy just dey prove dem wrong, match after match. Today, e score two fine goals (E don score 11 goals for Premier League so far). Now, we dey see why Jose Mourinho no fit drop am. E fit no get 90 minutes impact, but if you give am space for inside your box, e go damage you.
The third thing wey we observe na say e pain Wayne Rooney, say e no fit reach Sir Bobby Charlton goal scoring record today…The person wey put sand inside hin garri na Ben Foster, as e make one mad save to deny the skipper from scoring. That na the only chance wey Rooney see to score. We dey hope say e fit reach and break Sir Bobby’s record because e deserve am.
Another thing wey we observe na say nobody sabi the strongest Manchester United Starting Eleven. But the people wey get confam shirt na Paul Pogba, Ander Herrera, Antonio Valencia, Michael Carrick and Zlatan Ibrahimovic. The rest na rotation policy and to dey pray say the person wey go play, go turn up that day. Our defence na the biggest shock wey happen this season, our back-up defenders (Rojo & Jones) even more solid than our original centre-backs ( Bailly & Smalling)
The last thing wey we observe na say the belief don come back again among our players and Manchester United fit finish top four for Premier League this season if them continue this good run. The koko na to pick up three points again for our next match.