Five Things wey we observe as Manchester United knack Sunderland 3-1: Paul O don dey prove hin worth


Today na good day for Manchester United fans as The Red Devils bin knack David Moyes’s Sunderland men 3-1. The People wey score for United na Daley Blind, Zlatan Ibrahimovic and Henrikh Mkhitaryan while the person wey score the only goal for Sunderland na Borini. As everything be now, Jose Mourinho’s men don continue their unbeaten run and their confidence don dey increase small small. 

We sharply wan talk about the five things wey we observe for the match: 

The first thing wey we observe na say Manchester United don dey play like a team. The whole unit don dey gel. E be like say the days of depending on individual brilliance to win match, don finish as everybody dey put body for ball to collect three points. I no fit name one person wey play rubbish for United today, onto say everybody play better ball but na Ibrahimovic, Pogba, and Valencia play pass. 


The second thing wey we observe na say Henrikh Mkhitaryan don score the Best Goal of the Premier League season. Fashi say him bin stand for offside position, the fact say linesman no see am, mean say e dey clear ‘On Side’. The way hin take finish that ball ehn, scorpion kick toh bad. None of the defenders expect say e fit tear net like that, as that ball shatter net, e shock dem. 

Another thing wey we observe na say Zlatan Ibrahimovic too dey waste chance. If say Papa Ibro dey very serious today, we for don win by more than six or seven goals but e just dey spoil ball. E miss plenty one on ones and some of hin final balls bin fall hand. We just dey thank God say e score today sha, after all hin miss miss. But e gots work on hin scoring if e wan carry us enter top four, as United goal difference dey inside gutter right now.

Another thing wey we observe na say Phil Jones and Marcos Rojo combination don continue from where dey stop, for their last match i.e “Dem Solid Gan”. Right now, Eric Bailly don come back from wound but e no fit make bench as chance no dey. E fit be say Jose Mourinho dey already plan for life without am, as Bailly go soon go for African Nations Cup when January knack.

The last thing wey we observe na say all the other top clubs win today, even if we no fit reduce the gap on any of them, we sha dey give dem close marking. Anybody wey slip up, we go chance am. The players don dey believe say dem fit finish for top four. 

One thought on “Five Things wey we observe as Manchester United knack Sunderland 3-1: Paul O don dey prove hin worth

  1. E pain me say Arsenal win kia we for don cover some gap. I don dey Believe this team them don dey try I no sure say anybody go fit do them yeye again.

Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s