Better ogbonge Happy New Year to una……..we for @manutdinpigdin wan take this medium wish una better better 2017 and we wan tell una thank you for all una support for the former years wey don pass. We say double twale to una and we dey promise una better ogbonge plenty things for this new year join the ones wey we don dey do before…….once again we dey cut our cap for una and we say thank you well well, una too much.
Last year our darling team be get plenty up and down tori wey be say one minute we dey reason say our club don finally dey be wettin we sabi then before you know am them go fall our hand. Though the year no too plumb like that but e no bad reach some club own…..after all we win FA Cup and oga Van Gaal a.k.a Baba Philosophy be pack hin load commot and oga Mourinho be enter.When hin be first come, things no too gel like that for the team as all of us dey reason say e go be especially for inside league where e be get one time wey be say we just dey draw like okoro soup, but finally finally we be see the real correct Manchester United for the ending of 2016 inside league as we gather better ginger to win all the 5 matches wey we play for December, we gather better 10 matches unbeaten run inside league, we don dey turn Old Trafford to our Lion den back and to come end am we be do come back victory to end 2016…….na this one sweet me pass as e don tey wey we do come back…….I just hope say this ginger to continue for 2017.
For this year 2017, our first match na league match against West Ham United for London Stadium and the time na 6:15 pm for 9ja time. This na the third time we dey jam this season but na the first time we go jam for their house-we be follow them play 1-1 for league but we knack them 4-1 for league cup. As na our routine we go dey yarn una all the match tori for our twitter page wey be @ manutdinpigdin. Make una no forget to check all our other social media pages sef for other things wey concern our darling club……our account na one and the same @manutdinpigdin.
Small Tori Tori about Dis Match
For West Ham side, their captain Mark Noble fit no dey as hin be woundjure for their last match. But Alvaro Arbeloa, Arthur Masuaku, Diafra Sakho and Gokhan Tore no go dey for the match.
For our side, Eric Bailly no go dey as hin don travel go join hin country people for Africa Cup of Nations. Bros Carrick and Bros Rooney fit dey after them no dey the match wey we take knack Middlesbrough. Bros Rooney be woundjure and Bros Carrick bin no well.
Proper Proper Match Tori
- West Ham dey reason to go 5 match unbeaten against Manchester United inside league for the firs time…….them dey form smart abi, them go jam tomorrow;
- Na only against Chelsea (8 games, 2013-present), Liverpool (5, 2000-2002), Blackburn Rovers (5, 2004-2006) and Tottenham Hotspur (5, 2012-2014) na hin Red Devils don get problem to win inside Premier League.
West Ham United
- Them don win back-to-back Premier League games for their London Stadium for the first time and all the 4 matches wey them don win for house na with 1-0 scoreline;
- For inside their 9 league matches for house na only 1 time them tear net pass once-for their 2-4 loss to Watford;
- Na only two times them never tear net inside 28 league matches for their house under their oga Slaven Bilic;
- Dimitri Payet don join hand create league-high 72 chances inside Premier League this season, and hin use 52 pass other West Ham players.
- Them don win 5 away matches inside league already after them be manage to win only 7 throughout last season;
- Them dey unbeaten inside the last 4 away matches wey them play; them never go 5 unbeaten inside Premier League since them be do 7-match unbeaten for February 2015;
- Na only two of their last 10 league matches them don win for London-both na the 2-1 knackings wey them give Crystal Palace;
- Paul Pogba don join for 4 goals inside hin last 4 Premier League showings (2 goals, 2 assists).
I dey believe say the ginger wey we don gather so never commot for our body and West Ham go wan show strong head but we go knack them at least 2-1. Una fit drop una prediction for the comment box wey dey below…….Once again we dey wish una; Better ogbonge 2017 with plenty jollification. #GGMU.