FA Cup: Five Things we observe as Manchester United knack Reading 4-0

Today na good day for the Defendin FA Cup Champions, as Manchester United knack Reading apako sote dem wan

shit for pant, na 4-0. The people wey score for the Red Devils na Wayne Rooney, Anthony Martial, and Marcus Rashford (2).

As everything be now, e mean say Jose Mourinho’s men don win 8 matches in a row. The Red Devils go focus their attention on the League Cup Semi-Final match wey dem get against Hull City for Old Trafford on Tuesday.

We sharply wan talk about the five things wey we observe for the match:

The first thing wey we observe na say Red Devils attack bin dey very fast and sharp today with Wayne Rooney, Marcus Rashford, Juan Mata and Anthony Martial. As match start, before Reading sabi as e dey go, United tear their yansh with 2 goals. Then, United con dey waste chance. Na for second half, wey Rashford tear their yansh twice. All round, our attack make brain today.

The second thing wey we observe na say Wayne Rooney don become living Legend as e equal Sir Bobby Charlton’s record of 249 Manchester United goals. Na Rooney wey score the first goal against Reading, after Juan Mata give am better assist. As Rooney score am, Sir Bobby just dey smile, onto say e bin wan make Rooney break hin record.

Another thing wey we observe na say Manchester United’s defence bin dey very solid today, even if no be the regular United back-line wey play today. The only person wey do mistake small na Ashley Young, some of hin passes na error but all round, the defence try. Na why Reading get only one shot on target. Our defence try sote Romero no even see work today, Baba just dey relax as Reading suffer, as dem no fit break down the Red Devils. One sad news, na say Marcos Rojo don wound. We just dey pray make hin injury no serious, so e go fit play against Liverpool.

Another Thing wey we observe na say the confidence in the whole Manchester United team don dey increase. As the Reds just dey knack teams dey go, everybody moral for the team don dey high. Upon say no be our first team wey play against Reading as people like Paul Pogba, Zlatan Ibrahimovic and Henrikh Mkhitaryan dey bench, we still knack dem 4-0.

The last thing wey we observe na say the midfield combo of Michael Carrick and Maroune Fellaini make brain today. E shock me when Fellaini dribble person, i no believe my eyes. Baba Fella ginger for attack. As for Carrick, na him do assist for the first goal wey Marcus Rashford score and e epp stabilize the team. We just dey hope say things go continue like this for United.

One thought on “FA Cup: Five Things we observe as Manchester United knack Reading 4-0

Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s