Today na sad day for most Red Devils fans, as dey bin dey expect say Manchester United go knack Liverpool but wetin happen for Old Trafford na 1-1 draw. The person wey score for Liverpool na James Milner, after Paul Pogba dash dem pena. While na Zlatan Ibrahimovic equalize for United.
As everything be now, make Jose Mourinho’s men fashi title race, as dem dey 12 points behind Chelsea, wey dey top table. Jose Mourinho and hin men fit dey aim for second/Third onto say dem dey 5 points behind 2nd placed Tottenham.
We sharply wan talk about five things wey we observe for the match:
The first thing wey we observe na say Paul Pogba bin play total rubbish. If i go dey honest, na hin worst appearance so far this season. Almost everything wey hin do na error. Na him dash Liverpool pena. Many people go surround am, instead make he pass normal ball, e go wan dribble or e go wan do skill and dem go collect ball go attack United. The only thing wey remain for the match, na make dem give am Liverpool jersey, onto say e play well for dem.
The second thing wey we observe na say Liverpool park the bus througout second-half. Na wetin make Jose Mourinho no use Marcus Rashford as sub, instead e go for Wayne Rooney, Juan Mata and Maroune Fellaini. At first, people dey vess for the changes but na dem ginger, wey make United see one point for this match.
Another thing wey we observe na say Liverpool bin use speed close down our defensive midfielder (Carrick) and Centre-backs (Rojo and Jones), for first half. The person wey e affect pass na Carrick o, E make am play rubbish sote the guy con dey throw passes wey dey go astray. Na wetin make Mourinho commot am at half-time.
Another thing wey we observe na say the game changer na Maroune Fellaini. Out of all the subs wey Mourinho make against Liverpool, na him wey impact the match pass. Almost all hin touches for the match na Class and e get strong hand for the goal wey United score. Juan Mata no too do anything, Wayne Rooney enter like say e wan do better thing but after hin first few nice touches, e con dey play rubbish. But Baba Roo still get hand for the Equalizer. Na him cross wey start the whole pressure.
The last thing wey we observe na say fighting spirit still dey Manchester United body onto say moral dey high. Na wetin make dem come back against Jurgen Klopp’s tactical Liverpool side. Our prayer na say Jose Mourinho and hin men go make top four. Make we dey see sha.