Everything to Ginger Una for SAINT-ETIENNE vs Manchester United

Europa League

Competition: Europa League

Date: Wednesday, 22nd February 2017.

Round of 32; Leg 2 of 2 (agg.0-3 for United)

Time: 06:00 p.m

Venue: Stade Geoffroy-Guichard

We dey waka go France to go play the second leg of our Europa League game against Saint-Etienne. The match dey happen tomorrow Wednesday, 22nd February 2017 by 6:00 p.m for 9ja time. If you no fit watch the match no worry as we for @manutdinpidgin go dey yarn all the match tori from beginning reach end of match. Our match tori go dey start from 5:00 pm (9ja time). So sharply sharply go purshue us for twitter so you no go miss anything as e dey happin for the match. You still fit like our page for Facebook, our pictures for Instagram and our plenty ogbonge videos for Youtube……our handle never change na still @manutdinpigdin and na we fit dey sama you with all the better better tori wey join for Manchester United matter for our country man language.

As e be so we don win first half of this match for Old Trafford when the two teams be jam last week. As Baba Zlatan be tear net three times that day to be record hin first hat-trick for Manchester United and the match be end 3-0 for our favour. Some people go dey wonder why the match dey happen for Wednesday instead of Thursday wey be regular time for Europa League game. Well the reason be say Saint-Etienne rival wey be Lyon get Europa League match sef for Thursday and because of the distance wey dey between them our own match go sharply happen for Wednesday to save space for Lyon.

We dey waka enter the match with better correct ginger as we be knack Blackburn 2-1 inside match wey we play for weekend. This one mean say we still get better chance for inside three different competitions and once we complete this job for second half tomorrow we go continue our waka for Europe. Saint-Etienne for their side no get better luck because after them chop am finish for Old Trafford, them still chop am for weekend inside their league and them go wan use us do lesson-but that one no fit happen.

Tori Tori about Dis Match

zlatan

For our door mot Bros. Rooney a.k.a Papa Kia follow the team waka go France as hin never well from the woundjure wey hin be get since all these days, even Jones never well from hin woundjure. But one better tori about am be say hin follow the remaining guys train today for training ground.

Timothy Fosu-Mensah be follow the team waka but Luke Shaw and Matteo Darmain no follow go. Ander Herrera no follow the team waka ashin dey serve punishment-that one mean say hin go rest better for our EFL Cup final for Sunday.

Bros Zlatan go like start this match because hin dey correct better form and hin dey hot like fire. The ball wey hin use tear net for weekend against Blackburn na hin 24th goal inside all competitions this season, and na hin 18th inside 20 showings. But all this Saint-Etienne people go dey fast and pray make hin no dey because them be hin regular customer as hin don tear net 17 times inside 14 showings against them.

Oga Mourinho no like to lose at all at all the kin jubilation and changes hin do for FA Cup make me know say hin no get time to play inside any competition so I believe say we go tear net at least time so the game go commot for their hand. You fit drop your own prediction of the match for our comment box below or for our twitter page………..#GGMU.

 

One thought on “Everything to Ginger Una for SAINT-ETIENNE vs Manchester United

Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s