Everything to Ginger Una for Manchester United vs Southampton

img_20170223_154606

Competition: EFL Cup- Final

Date: Sunday 26th, February 2017.

Time: 5:30 pm

Venue: Wembley Stadium

Yes oh……all our hard work for EFL Cup don show better reward as we go dey jam Southampton for the final for Wembley Stadium tomorrow Sunday 26th February 2017 by 5:30 pm (9ja time). Normal normal una fit get all the tori wey dey shele inside the match for @manutdinpidgin ontop twitter. We go yarnings about the match tori by 4:30 pm (9ja time) so if you never dey purshue us sharply go join for people wey dey purshue us for @manutdinpidgin for twitter so you no go miss anything. You still fit like our page for Facebook, our pictures for Instagram and our plenty ogbonge videos for Youtube……our handle never change na still @manutdinpigdin and na we fit dey sama you with all the better better tori wey join for Manchester United matter for our country man language.

We dey enter this final for better form as we be get five unbeaten inside current matches wey we don play. Part of the winning na the flogging wey we flog Blackburn Rovers inside Emirates FA Cup and the one we flog Saint-Etienne for Europa League. The two winnings mean say we don graduate go next round of the competitions. Southampton never tap ball for two weeks as the last match them be play na the 4-0 flogging them give Sunderland for Premier League. That match na their first win inside four matches. So this one mean say them don get correct proper rest and better ginger for their first League Cup final since 1979 but their form no too make brain like that. Before we yarn far make we sharply talk how the two teams waka reach final;

For our side, we be start our waka for the competition with flogging as we be flog Northampton Town 3-1, Mata kon make sure say our flogging pattern continue as hin score to tear net against Manchester City as we be win the match 1-0. From there we kon flog West Ham United 4-1 for quarter-final before we kon knack Hull City 3-2 for aggregate inside semi-final after we be win first leg for Old Trafford 2-0 but them kon win 2-1 for their house.

For Southampton side them be jam Premier League teams all through the competition as first them flog Crystal Palace 2-0 for third round before them kon commot Sunderland as them be flog them 1-0. From there them be jam Arsenal for quarter-final and them flog them 2-0 before them kon flog Liverpool 2-0 for aggregate inside semi-final after them first flog them 1-0 for their house and kon still flog them 1-0 for Anfield.

We be get better history for this competition as we don carry am four times and winning for Sunday mean say we go carry am for the fifth time. The last time we carry am na for 2010 when we be come from goal down to flog Aston Villa 2-1. Southampton never carry am before and the last time them be reach final before this one na for 1979 and them be lose the match 3-2 to Nottingham Forest.

Small Tori Tori about Dis Match

c5sushmxuaipd0b

For our doormat, Henrikh Mkhitaryan “Miki-Miki” no go dey the match as hin get woundjure from our last match for Europa League. Our senior man for midfield “Senior Bros” Michael Carrick go dey for the match even though hin sef carry small woundjure for that match for France but Phil Jones no go dey as hin never balance wella from hin woundjure against Hull City. One better tori be say Oga Mourinho don talk say Captain Wayne Rooney a.k.a Papa Kia go dey the match and hin go play as hin don dey train and ginger wella.

For Southampton doormat, their new pikin Martin Caceres fit tap ball for hin first match inside this final after them be sign am last week. Them they pray say make Sofiane Boufal don well from hin woundjure but Charlie Austin, Virgil van Dijk, Jeremy Pied, Matt Targett and Alex McCarthy no go show for the match at all at all.

Proper Proper Match Tori

Head-to-Head

  • This na the second time the two teams dey jam for final of competition. The first time na for 1976 inside FA Cup final and Southampton be flog United 1-0 to carry the cup that time-that one na tori wey no fit happen now.
  • Southampton na the third team wey United go dey jam inside both FA Cup and League Cup final. The first two na Aston Villa and Liverpool.

Manchester United

  • This na the 9th League Cup final wey them go dey show inside (W4, L4) but the most recent winnings na for our last three finals wey happen for; 2006 vs Wigan, 2009 vs Spurs, and 2010 vs Aston Villa;
  • Na only Liverpool (12) don enter more League Cup finals pass United (9) and na only Arsenal (5) don lose inside finals pass the Red Devils;
  • Oga Jose Mourinho don enter League Cup final three times before before as Chelsea oga for 2005, 2007 and 2015-and hin be win am all the three times. Na him get the best win percentage for oga inside League Cup finals-three twale for our oga;
  •  Na only Brain Clough (4) and Oga Sir Alex Fergunson (4) don carry the League Cup pass oga Mourinho (3);
  • Oga Mourinho never lose any English domestic cup final for hin career as hin be carry FA Cup for 2007;
  • Bros Zlatan be tear net four times inside four domestic cup finals for Paris St-Germain (PSG) minus Super Cups.

Southampton

  • Na them go be the second side for history wey go reach League Cup final and them no open yansh for anybody. The first side na Tottenham Hotspur but them kon lose 3-1 to Liverpool for 1981-82 League Cup final;
  • Their oga Claude Puel don enter only one better domestic cup final for hin career as hin carry Monaco enter French League Cup final for 2001 but them chop am 2-1 against Lyon-na wettin go happen tomorrow be that.

The man wey go ref the match tomorrow na Andre Marriner. Hin don ref 26 matches this season and hin don show 6 red cards and 102 yellow cards. The last match wey hin ref United we be win 4-0 against Reading but hin sef still ref our 1-1 match against Arsenal inside Premier League.

I believe say with this our form and way our boys don gel especially Pogba and Zlatan plus our record for Wembley and Oga Mourinho record for League Cup final we go knack Southampton to carry the first trophy of the season. Una fit drop una prediction for the comment box below or for our twitter handle @manutdinpidgin……..#GGMU.

 

 

Advertisements

Wetin you think?

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s